“Сахалыы билбэт оҕо элбээтэ” – диэн этэр киһи күн-түүн эбиллэн иһэр. Ону бу курдук эмиэ быһаарыахха сөп эбит. Хайдах курдук бэркэ тобулан таһаарбыттарый?
Интэриниэт күннээҕи олохпутугар киириэҕиттэн, нууччалыы тылланар оҕо үксээтэ. Оннооҕор улуус, тыа сирин оҕолоро нууччалыы эрэ саҥараллар. Тустаах боппуруос бүтүн норуот кыһалҕатыгар кубулуйан эрэр. Ол эрээри, ону туоратар туһугар киһи барыта ылсар буолбатах.
Бу көрөр үтүлүк хартыыната батсаабынан кэллэ. “5-с “А” кылаас үөрэнээччитин Яна Платонова үлэтин билиһиннэрэбит. Үтүлүктэри сукунаттан иистэнньэҥ идэлээх ийэтэ тигэр, Яна уруһуйдуур. Бииригэр — нууччалыы, иккиһигэр — сахалыы. Сыаната 400 солк.”, — диэн суруктаах. Оҕо көрөн ылынар дьоҕура күүстээх. Онон “сүүстэ истибиттээҕэр биирдэ көрбүт ордук” диэн өс хоһооно бу түгэҥҥэ ордук табыгастаах. Дьон өйүгүттэн (идиэйэ) киһи эрэ сөҕөр. Бу барыта кыһалҕаттан тобуллубута саарбаҕа суох.
“Саха сирэ” хаһыат, edersaas.ru