Сэтинньи 22 күнүттэн ахсынньы 5 күнүгэр диэри өрөспүүбүлүкэ үрдүнэн буолар Олоҥхо дэкээдэтинэн 60-тан тахса тэрээһин ыытыллыаҕа. Интэриниэтинэн, тэлэбиидэнньэнэн трансляциялар, видео-сибээһинэн тэрээһиннэр, лиэксийэлэр, куонкурустар, быыстапкалар, туруоруулар былааннаммыттара.
СӨ култуураҕа уонна духуобунай сайдыыга миниистири бастакы солбуйааччы Владислав Левочкин: «Өрөспүүбүлүкэтээҕи былааҥҥа киирбит тэрээһиннэринэн эрэ муҥурдаммакка, улуустар бэйэлэрин бырагыраамаларынан эмиэ ыытыахтара. Быйыл бастакытын ыытыллар тэрээһиннэр эмиэ бааллар. Ол курдук, Олоҥхонон олимпиада буолуоҕа. Манна өрөспүүбүлүкэ үгүс оскуолалара кыттыахтара», — диэн этэр.
Олоҥхо өрөспүүбүлүкэтээҕи ассоциациятын бэрэсидьиэнэ Февронья Шишигина бэлиэтииринэн, бүтэһик сылларга эпоска интэриэс улааппыт. «Биһиги түмсүүбүт 18 оройуонунан, куораттарынан филиаллаах. Олоҥхо күннэрин ыытар кэммит устата олоҥхоһуттар баар буолбуттара үөрдэр. Эдэр олоҥхоһуттар тахсыбыттара өссө үөрдэр», — диэн бэрэсидьиэн этэр.
Бэлиэтээн суруйдахха, Олоҥхо дэкээдэтэ 2009 сылтан ыытыллар. Бу күннэринэн сибээстээн тыйаатырга Степанида Борисова «Кыыс Дэбилийэ», Андрей Борисов «Ойуун түүлэ» туруорууларын көрүөхпүт.
Денис Попов хаартыската.