Сэтинньи – Уус Алдаҥҥа Олоҥхо ыйа.
Ол курдук, сэтинньи 22 күнүгэр Бороҕоҥҥо Ульяна Бурнашева «Кустук өҥнөөх кулунчук», Семен Черноградскай «Хопто буурай аттаах Хапталдьын Баатыр бухатыыр» кинигэлэрин сүрэхтэниитэ буолла.
Биир дойдулаахтарбыт олоҥхо умсугутуулаах тылынан суруйбут кинигэлэрэ күн сирин көрөр дьоро түгэннэригэр улуустааҕы Олоҥхо Ассоциациятын, култуура, үөрэх управлениеларын, үөлээннээхтэрин, биир идэлээхтэрин, аймахтарын ааттарыттан истиҥ эҕэрдэ тылларын эттилэр.
Ульяна Ивановна олоҥхотун биир дойдулаахтара лөгөйдөр уонна Семен Ильич олоҥхотуттан быһа тардан, Ваня Колодезников, толордулар.
Кэлбит ыалдьыттарын кинигэ ааптардара сылаас саламаатынан, арыылаах алаадьынан, үтэһэлээх этинэн, убаһа хаттатынан, эмис сыалаах убаһа этинэн, уохтаах кымыһынан, итии үүттээх чэйинэн күндүлээтилэр.
Сахалыы астаах остуол тула олорон тэрээһин кыттыылаахтара олоҥхо кинигэлэрин тула санааларын атастастылар, ирэ-хоро кэпсэттилэр.