Уус Алдаҥҥа Олоҥхо декадатын чэрчитинэн оҕолорго бэрт сэргэх тэрээһиннэр ыытыллаллар. Бу туһунан биһиэхэ улуустааҕы оҕо бибилэтиэкэтин сэбиэдиссэйэ Вера Портнягина иһитиннэрдэ.
—Оҕо билиитин байытар, тылын баайын хаҥатар сыаллаах-соруктаах “Олоҥхо алыптаах эйгэтэ” диэн оскуолаларга, оҕо саадтарыгар тэрээһиннэри ыытабыт, анал уруоктары тэрийэбит, бэсиэдэлэри оҥоробут, оонньотобут, күрэхтэһиннэрэбит, — диир Вера Алексеевна. Маныаха “Олоҥхо эйгэтэ” диэн кинигэлэринэн быыстапка оҥорон туруораллара кэнчээри ыччат олоҥхо туһунан билиини, өйдөбүлү ылалларыгар, өйдөрүгэр-санааларыгар иҥэринэллэригэр ордук улахан туһалааҕын бэлиэтиир.
“Кулун Куллустуур” олоҥхону алын сүһүөх кылаас оҕолоро улаханнык сэргээбиттэр, сэҥээрбиттэр. Онуоха оҕолор араас сорудахтары толорон, күрэхтэһэн букатын астыммыттар. “Олоҥхо ыллыктарынан айан” остуол оонньуутугар, ыйытыыларга хоруйдааһыҥҥа үөрэнээччилэр маннык тэрээһиҥҥэ үөрүйэхтэммиттэрин быһыытынан, сыллата көхтөөх буолан иһэллэрин этэр.
Кырачааннарга олоҥхо дьоруойдарынан куукулалары билиһиннэрбиттэр, олоҥхоттон кэпсээбиттэр, илиилэригэр туттаран оонньоппуттар. Бу куукулаларын бибилэтиэкэ дириэктэрэ ааспыт сылларга төрөппүттэр оҕолорун кытта ис сүрэхтэн астынан, иэйэн туран оҥорбуттарын кэпсиир. Куукулаларга эбии саҥалары оҥоруохтарын баҕалаахтар баалларыттан үөрэр. Оскуола үрдүкү кылааһын оҕолоругар «Олоҥхолуун көрсүһүү» хайысханан үлэ ыытыллыбыт. Кинилэргэ педагогическай үлэ бэтэрээнэ, саха оһуохайын Дархан этээччитэ Семен Черноградскай “Хопто Буурай аттаах Хапталдьын Баатыр” олоҥхотун билиһиннэрбит. Сахалыы уус-уран тылынан иһитиннэрэри сэргэ, англия тылынан кэпсээбитэ улаханнык сөхтөрбүт. Маны сэргэ, «Ойор-тэбэр аттаах Оҕо Бочоох Бухатыыр» кинигэ биһирэмигэр сылдьыбыттар, ыалдьыттаабыттар истиҥ көрсүһүү тэриллибититтэн астыммыттарын биллэрбиттэр.
“Элэмэс аттаах Эрили Бухатыыр” Галина Иванова-Айтыына оҕолорго аналлаах олоҥхотун биһирэмэ ураты сэргэхтик ыытыллыбыт. Кэпсэтиигэ, санаа үллэстиитигэр оҕолор көхтөөх кыттыыны ылбыттар. Түмүккэ, дьон-сэргэ, оҕо-уруу ааҕарыгар анаан, икки ааптартан бибилэтиэкэлэр кинигэ бэлэх ылан улаханнык үөрбүттэр.
Биһиги корр., «Саха сирэ» хаһыат, edersaas.ru