Ил Дархан Айсен Николаев чугастааҕы сылларга Олоҥхо ыһыахтара, аны, ханнык улуустарга ыытыллыахтарын быһаарда.
Айсен Николаев бу туһунан 529-РГ №-дээх дьаһалга илии баттаата. Итинэн кини 2020-2024 сылларга Олоҥхо ыһыахтара ыытыллаллара былааннаммыт улуустар испииһэктэрин бигэргэттэ.
Докумуон быһыытынан, 2020 сылга Олоҥхо ыһыаҕа Өлүөхүмэҕэ ыытыллара былааннанар. Санатан эттэххэ, Айсен Николаев Өлүөхүмэҕэ оробуочай сырыытыгар эһиилги Олоҥхо ыһыаҕа буолуохтаах сиригэр, «Аанньаах хочото — Солнечная долина» ландшафтнай-этнографическай комплекс сирин-уотун көрбүтэ-истибитэ. Ити сиргэ 3000 миэстэҕэ тырыбыналары тутуу саҕаланна. Күнү көрсөргө сиэри-туому оҥорор эбийиэктэр уонна миэтэрэ суоннаах 166-лаах тииттэн Тойон сэргэ номнуо тутуллубуттар.
2021 сылга Олоҥхо ыһыаҕа Өймөкөөҥҥө, 2022 – Үөһээ Бүлүү, 2023 — Амма улуустарыгар, 2024 сылга Нерюнгри оройуонугар ыытыллаллара былааннанна.
Айсен Николаев СӨ Бырабыыталыстыбатыгар сыл ахсын Олоҥхо ыһыаҕын тэрийэр кэмитиэттэр састааптарын Ил Дархаҥҥа бигэргэтиигэ киллэрэллэригэр соруйда.
Олоҥхо ыһыаҕа саамай тапталлаах, күүтүүлээх уонна киэҥ далааһыннаах бырааһынньыгынан буолар. Олоҥхо ыһыаҕын тэрийии былыргы дьыллар мындааларыттан, өбүгэлэрбититтэн ситимнэнэн кэлбит айымньылартан кыырпаҕынан хомуллан, ситимнэнэн, тиһиктэнэн, ситэн-силигилээн тахсан иһиитэ өссө ордук сыаналанар. Ил Дархан героическай эпоска анаммыт ыһыах өрөспүүбүлүкэбит бары норуоттарын биир түһүлгэҕэ түмэр дьикти уратылааҕын бэлиэтээтэ. «Олоҥхо – саха тылын модун күүһүн, чаҕылхайын, уратытын, сүөгэйин-сүмэтин түмэр муҥура суох улахан баайбыт. Бу норуоппут өлбөт-сүппэт, быстыбат тутула,» — диэтэ Айсен Николаев.
СӨ Ил Дарханын уонна Бырабыыталыстыбатын пресс-сулууспата.