Олоҥхо ыһыаҕар араас эрэгийиэннэртэн ыалдьыттар бааллар. Тываттан сылдьар АГИКИ устудьуоннара ыһыахха аан бастаан сылдьабыт диэн этэллэр.
Салгак Айдыс, муусукаан:
— Биһиги АГИКИ-га »артыыс маастарыстыбата» идэҕэ иккис сылбытын үөрэнэбит. Дьокуускайтан айаннаан кэллибит, ыһыахха аан бастаан сылдьабыт. »ЮНЕСКО шедеврдэрэ» диэн улахан тэрээһиҥҥэ кытта сылдьабыт. Тыва норуотун национальнай инструменнарыгар оонньуубут, хабарҕа ырыатын толоробут.
Биһиэхэ эмиэ »Наадым» диэн национальнай бырааһынньыктаахпыт, атырдьах ыйыгар ыытыллар, онно маарынната көрдүбүт. Андрей Саввич курдук улахан режиссердаах, тыйаатыр ускуустубата сайдыбыт дойдута буоларгыт биллэр, Олоҥхо ыһыаҕын арыллыыта олус сиэдэрэй, кэрэ көстүүлээх. Ону тэҥэ, алгыһы, алгысчыт уоту аһатыытын, Үрдүкү Айыыларга сүгүрүйүү сиэрин-туомун олус кэрэхсии көрдүбүт, бу маннык үгэстэр билиҥҥэ диэри тиийэн кэлбиттэрэ олус үчүгэй. Сүрдээх кыраһыабай, дириҥ суолталаах үгэс, ону көрөн сөхтүбүт-махтайдыбыт.
Саха Саҥа дьылыгар ыраастанан, ыраас санаалаах, саҥа эрэллээх үктэнэргит бэртээхэй.
Ангелина Васильева, »Саха сирэ» хаһыат, edersaas.ru
Хаартыска: ааптар түһэриитэ.