XV үбүлүөйдээх Олоҥхо ыһыаҕа түмүктэннэ. Икки күн устата барбыт күрэстэр саха төрүт култуурата, ийэ тылбыт, үгэстэрбит сүппэттэрин, үйэлэри уҥуордаан, үүнэр көлүөнэлэргэ бэриллэ туралларыгар туһуланан ыытылыннылар.
Ол курдук, Үөһээ Бүлүүгэ ыытыллыбыт Олоҥхо ыһыаҕын кыайыылаахтара ааттаннылар. Олоҥхоһуттарга »Дарханнар дарханнара» үрдүк ааты Сунтаартан Михаил Евсеев-Кураһаай ылла. Олоҥхоһут А.Титаров аатынан анал бирииһи Дьокуускайтан Афанасий Алексеевка туттардылар. Вадим Константинов аатынан анал бирииһи Үөһээ Бүлүүттэн Егор Егоров тутан үөрдэ.
»Кылаан чыпчаал» бирииһин оҕолорго Амматтан Мира Егорова, ыччаттарга Намтан Яна Ньургусова, улахан дьоҥҥо Тааттаттан Афанасий Попов ылан, 700 тыһыынча солкуобайдаах сэртипикээтинэн бириэмийэлэннилэр.
Хомусчуттарга Кылаан кыайыылаах аатын Чурапчыттан Марианна Слепцова ылла.
Оһуохайга »Аан Дархан этээччи» аатын Үөһээ Бүлүүлэр кыыстара Сахаайта Мойтохонова ылан, үөрүүлэрэ үрдээтэ. Эдэрдэргэ »Кылаан чыпчаал бирииһин Ньурбаттан Прокопий Федоров ылла.
Уустарга »Кылаан чыпчаал» бирииһин Ньурбаттан Ариан Афанасьевка биэрдилэр.
Кэлэр 16-с Олоҥхо ыһыаҕа Өймөкөөҥҥө ыытыллыа. Ыһыах бэлиэтин Үөһээ Бүлүү баһылыга Владимир Поскачин Өймөкөөн баһылыга Иннокентий Сивцевкэ үөрүүлээх быһыыга-майгыга туттарда.
Үөһээ Бүлүүттэн Ангелина Васильева, »Саха сирэ» хаһыат, edersaas.ru
Хаартыскаҕа: «Кылаан чыпчаал» кыайыылааҕа Афанасий Попов.