Олоҥхо ыһыаҕын көрсө саҥа килиип сүрэхтэннэ (видео)

Бөлөххө киир:

Үөһээ Бүлүү улууһугар ыытыллыахтаах Олоҥхо ыһыаҕын көрсө  “Сахам тыына – өлбөөдүйбэт өркөн тыла” диэн саҥа килиип сүрэхтэннэ.

edersaas.ru

Үөһээ Бүлүү улууһун култуураҕа уонна духуобунай сайдыыга  департаменын салайааччы Cардаана Сергеевна Петрова килиип оҥоһуллуутун туһунан  маннык кэпсээтэ:

— Олоҥхо ыһыаҕар аналлаах килиипкэ хоһоон айарга улуус салалтата куонкурус биллэрэн,  элбэх киһи кытынна. Ол түмүгэр Үөһээ Бүлүүттэн төрүттээх,  айар куттаах Альбина Сыралыма  уонна  Индиана Феофанова тылларыгар суруллубут хоһоон бастаабыта. Улууспутугар муусука эйгэтигэр  айар куттаах,  талааннаах дьоммут элбэх. Кинилэртэн биирдэстэрэ, эдэр кэскиллээх ырыа айааччы, муусукаан Айсен Кысылбаиков матыыбын айда. Килииби таһаарыылаахтык үлэлии сылдьар оператор уолбут Айаал Евдокимов уһулла уонна таҥна. Сүрүн оруоллары култуура эйгэтин үлэһиттэрэ толордулар. Ырыаны Марианна Хобусарова, Юрий Васильев-Дьурай уонна матыып ааптара Айсен Кысылбаиков толордулар.

Килиипкэ култуура үлэһиттэрэ бары кыттаннар, ыһыахпыт, улууспут сүрүн өйдөбүллэрин, уратытын көрдөрдүлэр.

Сахам тыына — өлбөөдүйбэт өркөн тыла!

Быдан дьыллар быыстарыттан ой дуораана дуораһыйда,

Быыһык үйэ мындаатыттан ойдуо тыаһа онолуйда:

Хотун Бүлүүм кытылыгар урааҥхайбыт тоҕуоруста,

Айыыларга айах тутан, алгыс аныыр кэммит ситтэ.

Хос ырыата:

Саха омук саргыламмыт өрөгөйдөөх 100 сылынан!

Саха АССР   төрүттэммит үбүлүөйдээх үөрүүтүнэн!

Үөһээ Бүлүү уруй этэр, Улуу дьонун ахтан ааһар:

Уруй!Айхал!Убайдарга-Көҥүл ууммут Хотойдорго!

Удьуор ууспут сатабыла баҕах- сэргэ кэккэлэстэ,

Уран тарбах оһуор ииһэ- талба таҥас тоҕуоруста.

Кытыт биэбит кымыһынан көйүөр иһит иччилэннэ,

Кэриэн чороон ыксалаһан,кэрэхсэтэр кэһиилэннэ.

Хос ырыата:

Өбүгэбит олоҥхотун

өрөгөйдөөх

ыһыаҕынан!

Өспөт тыыннаах саха омук аман өһүн үөрүүтүнэн!

Үөһээ Бүлүү уруй этэр, уруу дьоннуун дьолун туойар:

Уруй! Айхал!Саха тыына-өлбөөдүйбэт өркөн тыла!

Ирбэт тоҥноох дойду сирбит тулхадыйбат модун күүһүн

Иэйэ эҥсэр добун тойук туругурда сатараатын!

Устар ууну сомоҕолуур оһуохайын уран тыла

Орто дойду олоҕунуун Олоҥхону ситимнээтин!

Хос ырыата:

Өбүгэбит олоҥхотун

өрөгөйдөөх

ыһыаҕынан!

Өспөт тыыннаах саха омук аман өһүн үөрүүтүнэн!

Үөһээ Бүлүү уруй этэр, уруу дьоннуун дьолун туойар:

Уруй! Айхал!Саха тыына-өлбөөдүйбэт өркөн тыла!

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0