Олоҥхо ыһыаҕынан сибээстээн, дьоҥҥо быһаччы туһалаах буоларын туһугар Кыыллаах нэһилиэгин дьаһалтата, тэрийэр бөлөх дьоҥҥо-сэргэҕэ иһитиннэрэн, улуус таһымнаах маастар-кылаастары ыыттылар. Тэрээһин буор босхо буолан, дьон улаханнык биһирээтэ, уопсайа, 90-ча киһи кытынна.
“Саха сирэ” хаһыат, edersaas.ru
Биллэрин курдук, бэс ыйын 19-21 күннэригэр Өлүөхүмэ маанылаах сиригэр-уотугар Олоҥхо ыһыаҕа буолаары турар. “Нэһилиэктэр тугу сатыырбытынан бэйэ-бэйэбитигэр көмөлөһө таарыйа босхо маастар-кылаастары ыытан көмөлөстөхпүтүнэ эрэ Олоҥхо ыһыаҕар бэлэм буолар кыахтаахпыт диэн сыаллаах-соруктаах ити тэрээһини ыыттыбыт. Маастар-кылааһы биэрбит, сылдьыбыт да дьон биһирээтилэр”, — диэн Кыыллаах нэһилиэгин баһылыга Раиса Лавернова кэпсиир.
Эрдэ кэлбиттэр олохтоох кыраайы үөрэтээччи, соторутааҕыта 85 сааһын бэлиэтээбит улаханнык ытыктанар Садот Моисеевич Малгаров тэрийбит мусуойун көрдүлэр.
Тэрээһин аһыллыытыгар тарбахха баттанар олохтоох иистэнньэҥнэр Виктория Алексеева, Жанна Желлаева тикпит халадаай ырбаахыларын, Лия Ларионова баайбыт сэлээппэлэрин, Ирина Торговкина туостан киэргэллэрин көрдөрдүлэр. Мустубут дьон таҥас-сап, киэргэл хас биирдии тигиитигэр тиийэ сирийэн көрдүлэр-иһиттилэр.
Маастар-кылаас иитинэн бибилэтиэкэр Октябрина Корнилова иис, саха таҥаһын туһунан быыстапканы, былыргы иискэ сыһыаннаах хаартыскаҕа түһэр зона бэлэмнээбитигэр өйдөбүнньүк гына түстүлэр. Кыыллаах оскуолата өйөөн, кыра төлөбүрдээх комплекснай эбиэтинэн хааччыйда.
Кыыллаах, Даппарай 13 олохтооҕо араас хайысхаларынан маастар-кылаастары ыыттылар. Ол курдук, сиэлтэн сибэкки (Л.С. Ларионова), элбэх утаҕынан өрүү (Е.И. Грязнухина, О.И. Корнилова), кылтан олбох (Р.В. Платонова), таҥастан кыбытыктаах олбох (П.П. Торговкина) тигиитигэр, туоһунан киэргэл (И.И. Торговкина), сапсыака (А.Н. Банчина), маһынан оонньуур, брелок оҥоруутугар (А.Д. Слепцов) маастар-кылаастары биэрдилэр. Дьокуускайдааҕы ойуулуур-дьүһүннүүр искусство кэллиэһин (училище) преподавателэ Надежда Корнилова ситии быаны хайдах сөпкө хатары көрдөрдө.
Элбэх оҕолоох ийэ, эбэ, бэйэтэ ураты талааннаах Мария Корнилова кумааҕынан кырыйары көрдөрдө, ону таһынан, оҕуруонан тигии, сүүтүк быыстапкаларын туруорда. Таҥас сыыһынан куукула, өрүс тааһыгар уруһуйдаан сувенир оҥорору оскуола технологияҕа учуутала Зоя Малгарова көрдөрдө. Сынньалаҥ кэмигэр улуустааҕы “Гармония” култуура киинин мэтэдииһэ Анна Романова өлүөхүмэлии оһуокайга маастар-кылаас ыытта.
Ииһинэн дьарыктанар урбаанньыт Жанна Желлаева халадаай ырбаахы, кэһиэччик тигиитигэр нэмиэт оҥортоон биэртэлээтэ, таҥастарын быһан биэрдэ, матырыйаал атыылаата. Киниэхэ уҥа илиитэ Н.В. Платонова күүс-көмө буолла.
Нэһилиэк баһылыктара массыынанан хааччыйан Дабаан, I Нөөрүктээйи, II Нөөрүктээйи, Кээччи, Каландарашвили, Үҥкүр, Солянка, Токо сэлиэнньэлэрин олохтоохторо кэлэн элбэххэ үөрэнэн бардылар.
Тэрээһин биэтэгин Токо нэһилиэгэ тутта. Ол эрээри, арыый тэйиччи сытар буолан, дьон ырааҕыргатарын биллэрэр, Өлүөхүмэ куоракка бэйэтигэр ыытталлар диэн санааларын этэллэр. Кэлиҥҥи кэмҥэ улуус таһымнаах маастар-кылаастары ыытар Жанна Желлаева нэһилиэктэргэ сахалыы таҥас нэмиэтин ыытыах итиэннэ эппиэттээх дьону аныаҕын иһитиннэрдэ. Маастар-кылаас биэрбит, үлэлэспит дьоҥҥо барыларыгар Кыыллаах нэһилиэгин дьаһалтатын аатыттан махтал суруктары туттардылар.
Людмила ПОПОВА, “Саха сирэ” хаһыат, edersaas.ru