Кулун тутар 31 күнүгэр Сургуулук нэһилиэгэр Саха АССР төрүттэммитэ 100 сылыгар аналлаах уонна Олоҥхо ыһыаҕын көрсө алгыстаах чороон тиийэн, тиксэн кэллэ.
Маҥаас нэһилиэгин дьаһалтатын, култууратын дьиэтин үлэһиттэрэ үөрүүлээх быһыыга-майгыга Сургуулук нэһилиэгин дьаһалтатын, култууратын үлэһиттэригэр нэһилиэнньэ иннигэр аҕалан алгыстаах чороону туттардылар.
Нэһилиэк бибилэтиэкэтигэр мустубут дьону саһарчы буспут алаадьынан, быырпаҕынан күндүлээтилэр. Саха АССР тэриллибит устуоруйатын, олоҥхо туһунан кэпсэтиилэр буоллулар. Онон Сургуулукка өрөспүүбүлүкэ үбүлүөйдээх, бэлиэ даататыгар уонна Олоҥхо ыһыаҕар аналлаах историческай, дьоһун тэрээһиннэр саҕаланнылар.
Муус устар 1 күнүгэр бырааттыы Боескоровтар ааттарынан орто оскуолаҕа учууталлыын-оҕолуун сахалыы сайбаччы таҥнан кэлэн алгыстаах чороону көрүстүлэр.
Оҕолорго Саха АССР тэриллибит устуоруйатын, чороон суолтатын, алгыстаах чороон бэлиэлэрин туһунан кэпсээтилэр.
Муус устар 2 күнүгэр олохтоох бибилэтиэкэҕэ » Алгыс» түмсүү кыттыылаахтара, нэһилиэк олохтоохторо алгыстаах чороону уруйдуу көрсүөхтэрэ. Историческай түгэни үйэтитэн хаартыскаҕа түһүөхтэрэ.
Саха АССР төрүттэммитэ 100 сылыгар аналлаах Олоҥхо ыһыаҕа улууспутугар ыытыллара 82 хонук хаалла. Алгыстаах чороон үбүлүөйдээх Олоҥхо ыһыаҕын илдьитэ буолан улууспут хас биирдии ыалын ахсын үөрүүлээх сонун, ытыктабыл бэлиэтэ буолан кэпсээҥҥэ сылдьар, дьону- сэргэни түмэр.
Валентина Филиппова