Култуура Маны аах Сүрүн

Олоҥхо ыһыаҕын холбоһуктаах бэлэмнэниитэ саҕаланна

Олоҥхо ыһыаҕын култуурунай бырагырааматыгар кыттааччылар түмүк бөлөхтөрө, Олоҥхо тыйаатырын  артыыстара, Өлүөхүмэҕэ кэллилэр.

edersaas.ru

Кинилэр Олоҥхо ыһыаҕын аһыллыытын сиэригэр-туомугар туттуллар реквизиттэри, көстүүмнэри, декорациялары аҕаллылар. Режиссердар уонна туруорааччылар: режиссердар, хореографтар, сценаристар, көстүүмнэр художниктара, сценографтар, звукорежиссердар, научнай консультаннар Өлүөхүмэҕэ өссө бэс ыйын 6 күнүттэн кэлэн үлэлии-хамсыы сылдьаллар. Бу кэм устатыгар репетициялар бөлөхтөрүнэн тэриллибиттэрэ, оттон билигин, култуурунай бырагыраама кыттааччылара бары мустаннар, холбоһуктаах бэлэмнэнии буолла.


Олоҥхо Ыһыаҕын арыйыы сиэригэр-туомугар Олоҥхо тыйаатырын, Аҕыйах ахсааннаах хотугу омуктар тыйаатырдарын, Үүнэр көлүөнэ тыйаатырын артыыстара, АГИКИ устудьуоннара уонна олохтоох айар кэлэктииптэр кытталлар. Урукку сылларга тэҥнээтэххэ, кыттааччы ахсаана аҕыйах да буоллар, тэрээһин былааннаммыт бэрээдэгинэн барыаҕа. Олоҥхо Ыһыаҕын арыйыы сиэрин-туомун сүрүн режиссер «Баҕалаах кытыл» өрөспүүбүлүкэтээҕи тыйаатыр бэстибээлин лауреата, Олоҥхо тыйаатырын режисера Павел Колесов туруорда.
Бэлэмнэниилэр бары сэрэтэр санитарнай дьаһаллары толору тутуһан, араас кэлэктииптэр бэйэ-бэйэлэрин кытары алтыспаттарын курдук тэриллэр, кыттаачылар бука бары инструктаж ылбыттара. Култуура уонна духуобунас миниистирин бастакы солбуйааччы Владислав Левочкин этэринэн, хара хамсыгынан сибээстээн итинник хааччахтар баалларын үрдүнэн, Олоҥхо Ыһыаҕын арыйыы сиэрэ-туома олохсуйбут үгэстэн туоруо суоҕа.


— Туруорааччы режиссердар иннилэригэр ыһыах сиэригэр-туомугар Саха сирин норуоттарын доҕордоһууларын көрдөрөр сорук туруоруллубута. Сиэр-туом үс түһүмэхтээх: түһүлгэни олохтооһун, алгыс сиэрэ-туома, Үрдүкү айыыларга айах тутуу уонна олоҥхонон театральнай дьүһүйүү, – диэтэ Вячеслав Левочкин.
Олоҥхо Ыһыаҕын арыйыы сиэрэ-туома 1 чаас 45 мүн. ордук уһуо суоҕа. Театральнай дьүһүйүү Өлүөхүмэ төрүт олохтоох норуоттарын эпостарыгар олоҕуран оҥоһуллуоҕа. Өрөспүүбүлүкэ олохтоохторо ону бэс ыйын 26 күнүгэр күнүс 11 чаастан «Саха» НКИХ быһа биэриитигэр көрүөхтэрэ. Бу туһунан Култуура уонна духуобунас министиэристибэтин пресс-киинэ иһитиннэрэр.

Раиса Сибирякова, «Саха сирэ» edersaas.ru

0
0