Бу күннэргэ Өймөкөөн улууһун биир дойдулаахтарын түмсүүтэ Туймаада ыһыаҕар дьонун-сэргэтин түмэн улахан бырааһынньыгы тэрийдэ.
Бу туһунан салайааччы Анна Атастырова маннык кэпсээтэ:
— Эһиил 2023 сылга Өймөкөөн улууһун Томторугар Олоҥхо ыһыаҕа ыытыллыаҕа. Быйылгы тэрээһиммит эһиил буолар өрөспүүбүлүкэтээҕи таһымнаах тэрээһиҥҥэ биир дойдулаахтарбытын түмүүгэ ананна. Улуус баһылыга Иннокентий Сивцев үбүлүөйдээх Туймаада ыһыаҕынан эҕэрдэлээн туран, эһиилги Олоҥхо ыһыаҕар барыларын түмсэргэ ыҥырда. Кини икки сылллааҕыта эбээн норуотун биллиилээх суруйааччыттыгар, учуонай Варвара Григорьевна-Аркукка улуус Бочуоттаах олохтооҕо аат иҥэриллибитин үөрүүлээх балаһыанньаҕа туттарда.
Коронавирус сыстыганнаах дьаҥын кэмэ буолан, суолталаах аат иҥэриллэн баран, Варвара Григорьевнаҕа барыта хааччах буолан, бу түгэни күүттэрэн, кэмэ кэлэн туттарылынна. Тэрээһиммитигэр Ил Түмэн дьокутааттара Сахамин Афанасьев уонна Любовь Явловская кэлэн эҕэрдэ тылын эттилэр. Нэһилиэктэр бары олус актыыбынай кыттыыны ыллылар. Ордук Сордоҥноох уонна Төрүт нэһилиэктэрин олохтоохторун бэлиэтиэм этэ. Ол курдук, Сордоҥноох нэһилиэгиттэн төрүттээх Мария Максимова дьиэ кэргэнин сахалыы таҥыннаран аҕалан, куонкуруска бастаан, Гран-при бирииһи ылла.
Мария Васильевна үлэтин быыстапкаҕа туруоран эмиэ дьон биһирэбилинэн бэлиэтэннэ. Маны таһынан, саха таҥаһын куонкуруһугар Төрүттэн Изабелла Кондакова 1-кы миэстэни, Хара Тумултан Валентина Атласова — 2 миэстэ, Уус Ньараттан Мария Кондакова 3 миэстэ буоллулар. Биһирэбил бириискэ Дьокуускай куораттан Фаина Румянцева тигистэ.
Тэрээһиҥҥэ сүүрбүт-көппүт уолаттарбытыгар Мирон Егоровка, Прокопий Дягилевка махтанабыт. Аппаратураны булбут Александр Оконешниковка барҕа махтал. Ыһыаҕы ыыппыт чуор куоластаах уолбутугар Николай Суздаловка, аппаратураны үлэлэппит Дмитрий Винокуровка эмиэ истиҥ махтал тылларын аныыбыт.
Төрүттэр олус да талааннаах дьон эбиттэр. Кырачаан Байдам Босиков олоҥхону толордо, норуот ырыатыгар кытынна. Норуот ырыатыгар Елена Слепцова, Байдам Босиков бастаатылар. Лилиана Потапова, Елена Слепцова дуэттаан, дьон махталын ыллылар.
Ханнык баҕарар тэрээһин спонсора суох сатаммат буоллаҕа. Махтал истиҥ тылларын аныыбыт биир дойдулаахтарбытыгар: Дьокуускай куорат ычччат уонна дьиэ кэргэн бэлиитикэтин управлениетын салайааччыта Ирина Атласоваҕа (үс улахан кинигэ уонна үс Полина Гагарина кэнсиэригэр билиэт), Николай Адушиновка (түһүлгэ өрөмүөнүгэр харчынан көмө), Александра Скрыбыкинаҕа (5000 солк. көмө), А.С. Винокуров дьиэ-кэргэнигэр (чаанньык бириис), А.А. Пономарев дьиэ кэргэнигэр (иһит бириис), «Зема» устудьуоннар түмсүүлэрин салайааччы Катя Борисоваҕа (наушник уонна сэртипикээт).
Ити курдук, биир дойдулаахтар түмсэн, бэртээхэй тэрээһини ыыттылар. Хомойуох иһин, үгүс дьон суолга массыына элбэ5иттэн бытаарыы үөскээн, түөрт чааһы быһа айаннаан тиийдилэр. Өймөкөөннөр суолталаах тэрээһинтэн кынаттанан, ким туох кыахтааҕынан эһиилги Олоҥхо ыһыаҕар көмөлөһүөх, өйүөх буолан тарҕастылар.
Елена ПОТОЦКАЯ, «Саха сирэ» хаһыат.