Биллэрин курдук, бэс ыйын 19-21 күннэригэр Өлүөхүмэ улууһугар Олоҥхо ыһыаҕа буолаары турар. Улуус баһылыга Николай Харбин быһа сибээс кэмигэр нэһилиэнньэ ыйытыытыгар хоруйдууругар, Олоҥхо ыһыаҕар кэлээччилэртэн быһыыны ылыы булгуччу ирдэнэрин иһитиннэрдэ.
Бүгүн, бэс ыйын 3 күнүгэр, Өлүөхүмэ улууһун баһылыга Николай Харбин инстаграмынан быһа сибээскэ тахсан, көрөөччүлэри долгутар ыйытыыларга хоруйдаата. “Өлүөхүмэҕэ ыытыллар быйылгы Олоҥхо ыһыаҕа олоҕурбут (традиционно) көрүҥүнэн барар. Ол эрээри, ыһыах буолар сирэ төһө кыалларынан “ыраас” буоларын туһугар, улуус таһыттан кэлээччилэртэн үрдүк ирдэбил туруоҕа – быһыы икки компоненын иккиэннэрин ылбыт буолуохтаахтар. Быһыы иккис компоненын ылыы иммунитет үөскээбитин туоһулуур. Роспотребнадзор ПЦР анаалыһы эмиэ ирдиир. Ирдэбили хонтуруоллуур инниттэн, куттал суох буолуутун хааччыйар уонна бэрээдэги көрөр бөлөх үлэтэ күүһүрүөҕэ.
Сайыҥҥы сынньалаҥнарыгар кэлэр оҕолор икки нэдиэлэ устата дьиэҕэ олорууну (самоизоляция) тутуһуохтаахтар”, — диэн быһаарда итиэннэ быйылгы Олоҥхо ыһыаҕа пандемия кэмигэр өрөспүүбүлүкэҕэ эрэ буолбакка, бүтүн Арассыыйаҕа ыытыллар бастакы улахан тэрээһин буоларын, бары эппиэтинэстээхтик сыһыаннаһыахтаахпыт диэн бэлиэтээн эттэ.
Людмила ПОПОВА, “Саха сирэ” хаһыат, edersaas.ru