Бэс ыйын 20-21 күннэригэр Үөһээ Бүлүүгэ Олоҥхо Ыһыаҕа буолуоҕа. Бу улахан тэрээһиҥҥэ 20 тыһыынча ыалдьыт кэлэрэ күүтүллэр.
Ыам ыйын 25 күнүгэр вице-премьер Сергей Местников тэрийэр кэмитиэт мунньаҕын онлайн көрүҥүнэн ыытта. Култуура, духуобунай сайдыы миниистирэ Юрий Куприянов бу кэмҥэ ыытыллыбыт тэрээһин үлэтин туһунан отчуоттаата.
—Быйыл ыһыах сүрүн идиэйэтинэн “Олоҥхо. Духуобунас – Дьиэ кэргэн. Уопсастыба – Төрөөбүт тыл” ситимэ буолуоҕа. Саха АССР 100 сылын уонна аан дойду норуоттарын култуурунай ситимнэрин чэрчитинэн ыытыллыаҕа. Олоҥхо ыһыаҕын бырагырааматыгар 100-тэн тахса тэрээһин киирдэ, — диэн кини кэпсээтэ.
Ол курдук, ыһыахха уустар күрэстэрэ, саха таҥаһын тигээччилэр, олоҥхону, тойугу, оһоухайы толорооччулар куонкурустара, араас быыстапкалар, уо.д.а. буолуохтара. Ыалдьыттар күнү көрсүү, кымыһы иһии, алгыс сиэригэр-туомугар кыттыыны ылыахтара. Ыһыаҕы арыйыы-сабыы сүрүн режиссерунан Руслан Тараховскай ананан, үлэлии сылдьар.
Олоҥхо тыйаатыра олоҥхоһут Андрей Титаров “Хардааччы Бэргэн” испэктээкил-олоҥхотун туруоруоҕа. Бүтэһик күҥҥэ К.Н. Никифорова-Лөкөчөөн «Хабыр киирсиилээх Хабытта Бэргэн» испэктээкил-олоҥхотун көрдөрүөхтэрэ.
Олоҥхо Ыһыаҕын чэрчитинэн, «Встреча шедевров ЮНЕСКО на земле Олонхо» норуоттар икки ардыларынааҕы IV бэстибээл ыытыллыаҕа. Ону тэҥэ, «Сохранение и популяризация нематериального этнокультурного наследия: традиции и современность» аан дойдутааҕы научнай симпозиум буолуоҕа.
Манна 6 дойдуттан, Арассыыйа 5 эрэгийиэниттэн 43 ыалдьыт кэлэрэ күүтүллэр. Ол курдук, Азербайджантан, Арменияттан, Индияттан, Киргизияттан, Кореяттан, Монголияттан уонна Алтайтан, Бурятияттан, Тываттан, Калмыкияттан, Москваттан ыалдьыттар кэлиэхтэрэ.
Спортивнай күрэхтэһиилэр, ат сүүрдүүтэ, оҕолорго аналлаах бырагыраама, Үүнэр көлүөнэ тыйаатыра туруорар «Үрүлү Бэргэн Бухатыыр» этно-испэктээкилэ, олохтоох олоҥхоһуттар тустарынан быыстапка, кинигэ быыстапкалара, худуоһунньук Дьулустаан Бойтунов быыстапката, о.д.а. тэрээһиннэр күүтэллэр.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru