Олоҥхо ыһыаҕа Үөһээ Бүлүү улууһун киинигэр бэс ыйын 20-21 күннэригэр ыытыллаары турар.
Тырааныспар уонна суол хаһаайыстыбатын миниистирэ Владимир Сивцев: “Ил Дархан Айсен Николаев дьаһалынан Олоҥхо ыһыаҕа буолар сиригэр чинчийии үлэ ыытыллыбыта. Онно олоҕуран ыһыахтыыр сиргэ тиийэр суоллар, массыыналар тохтуур сирдэрин схемата оҥоһуллубута. Оптуобустар сарсыарда 9:00 чаастан чаас аҥара арыттаах ыһыах ыалдьыттарын тиэйиэхтэрэ. Ону таһынан массыына тохтуур сириттэн Түгэхтэйгэ (Кыырт Далыгар киириилээх) диэри электромобилларынан тиэйии тэриллиэҕэ”, — диэн биллэрдэ.
Ыһыах ыалдьыттарын уонна кыттыылаахтарын тиэйиигэ Үөһээ Бүлүү иһинэн үс оптуобус маршрута тэриллиэҕэ. Ону таһынан икки маршрут чугас сытар нэһилиэктэри Харыйалааҕы (Кэнтик) уонна Хомустааҕы (Нам нэһилиэгэ) холбуохтара. Барыта 12 оптуобус ыһыахха үлэлиэҕэ.
Олоҥхо ыһыаҕын арыллыытыгар уонна сабыллыытыгар 8 электромобиль сүүрүөҕэ, атын кэмҥэ түөрт электромобиль сылдьыаҕа, атыттар ипподром таһыгар туспа сиргэ уотунан иитиллиэхтэрэ.
Маршруттар:
– 1 №-дээх маршрут: Күрдьэҕэлээх уул. – Нам суола – Ленин уул. – Карл Маркс уул. – Октябрьскай уул. – Ленин уул. – Петров уул. – Түгэхтэй.
– 2 №-дээх маршрут : Кэнтик суола – Күөллээх уул. – Карл Маркс уул. –Улгумда уул. – САССР 50 сыла уул. – Ленин уул. — Петров уул. – Түгэхтэй.
– 3 №-дээх маршрут: Карл Маркс уул. – М.Потапова уул. – П.Алексеев уул. – М. А. Алексеев уул. — Петров уул. – Түгэхтэй.
– 4 №-дээх маршрут: Түгэхтэй – Хомустаах
– 5 №-дээх маршрут: Ипподромҥа сүрүн парковка – Харыйалаах.