Олоҥхо ыһыаҕын сырдатыыга «Саха» НКИХ айар уонна тиэхиньиичэскэй үлэһиттэрэ эрчимнээхтик, күүстээхтик үлэлииллэрин бэлиэтиир наада.
Хампаанньа тэлэбиидэнньэҕэ дириэктэрэ Олег Колесов — Талбан үлэ хаамыытын бу курдук кэпсээтэ:
— Биһиги хампаанньабытыттан 32 киһи бэс ыйын 18 күнүгэр сарсыардаттан айаҥҥа туруммуппут. Кэлээт, үлэлиир сирбитин көрбүппүт-истибиппит, үлэбит миэстэтин оҥостубуппут. Бэс ыйын 19 күнүттэн сарсыарда Үөһээ Бүлүү ытык сирдэрин, интэриэһинэй дьону кытта көрсөн билсиһиннэрэр матырыйааллары уһуллубут. Күн аайы тохтоло суох араас тэрээһиннэри сырдата олоробут. Түбүктээх үлэбит сарсыарда 4-6 чаастан саҕаланар. Бэйэ-бэйэбитин солбуйсан үлэлиибит эрээри, үгүспүт иккилии-үстүү чаас утуйа түһэн баран, түһүлгэҕэ үлэлии тиэтэйэр.
Тэлэбиидэнньэ үлэһиттэрин кытта бииргэ «Тэтим» араадьыйа суруналыыстара үтүмэн элбэх киһини кытта көрсөн кэпсэтэллэр, аһаҕас эпиирдэри ыыталлар. Кинилэр аҕалан туттарбыт матырыйаалларын хара үлэтин режиссер Екатерина Голикова ыраастаан, чочуйан биэрэн, куйаар ситимигэр таҥан, эпииргэ ыытан иһэр. Успуорт сонунун кэпсиир Баһылай Посельскай күрэхтэһиилэри тута сырдатар маастар-суруналыыс. Эрэдээктэрдэр Ньургуйаана Ботуева, Татьяна Степанова, Иван Тарасов интэриэһинэй дьону булан кэпсэтэллэр, быһа эпииргэ таһаараллар.
Көрөөччүлэр Олоҥхо ыһыаҕын сиһилии хампаанньа суруналыыстара оҥорбут матырыйаалларын «рутубка» уонна «ютубка» билсиэхтэрин сөп.
Сылайары билбэт үлэлээх айар үлэһиттэри кытта биир сиргэ түспүт буолан, бу олус тэтимнээх, суолталаах үлэлээх «НВК-лары» кытта аан бастаан бииргэ алтыһан үлэлээтим. Уонна олус сөхтүм да, бэркиһээтим да. Дьэ, дьон үлэлиир да буолаллар эбит!
Үөһээ Бүлүүттэн Елена ПОТОЦКАЯ,
«Саха сирэ» хаһыат.