XIV-с Олоҥхо ыһыаҕа бэс ыйын 20-21 күннэригэр Өлүөхүмэ улууһугар «Аанньаах хочото» диэн сиргэ ыытыллара билиннэ. Култуура уонна духуобунас министиэристибэтэ этэринэн, ыһыах өбүгэ үгэһинэн ыыттыллара былааннанар.
edersaas.ru
Олоҥхо ыһыаҕын сүрүн режиссерунан Павел Колесов анаммыт. Тэрээһин сценарийын эрдэ улахан тэрээһиннэри ыытарга уопуттаах Майя Власьева уонна Зоя Попова буолбуттар. Ону таһынан Олоҥхо тыйаатыра «Улуу Даарын» диэн Шараборин-Кумаров олоҥхотунан улахан испэктээги көрдөрөрө күүтүллэр. Бу ыһыах сабыллыытыгар көстүөҕэ.
— Билигин биһиги иннибитигэр олохтоохтору уонна ыһыах кыттааччыларын вакцинациялааһыҥҥа улахан үлэ күүтэр. Кыттааччылары ыһыах ыытыллар улууһугар таһыы боппуруоһугар ыарахаттар бааллар. Ол курдук оройуоннааҕы порт өрөмүөннэнэ турар. Онон кыттааччылар уу суолунан айанныахтаахтар. Бары кыһалҕалары ситиһиилээхтик быһааран, күүтүүлээх бырааһынньыгы үрдүк таһымнаахтык ыытыахпыт диэн эрэнэбин”, — диир култуура миниистирэ Владислав Левочкин.
Олоҥхо ыһыаҕар элбэх тэрээһин барара күүтүллэр. Күнү көрсүһүү, ат сүүрдүүтэ, оһуохай, бөҕөстөр күөн көрсүүлэрэ, дьаарбаҥка уонна да атын үгэс быһыытынан ыытыллар тэрээһиннэр буолуохтара. Ыһыах биир тутаах тэрээһининэн “Дьоллоох өрөспүүбүлүкэ” саха киинэтин бэстибээлэ буолуоҕа. Бу бэстибээл 2017 сылга Үөһээ Бүлүүгэ “Манчаары оонньууларын” кэмигэр, 2018 сылга Алдаҥҥа ыытыллыбыт Олоҥхо ыһыаҕар ыытыллыбыта.
«Саха сирэ» хаһыат, edersaas.ru
Хаартыска yakutiamedia.ru