Олоҥхо ыһыаҕа буолуо 122 хонук хаалла

Ааптар: 
Бөлөххө киир:

Үөһээ Бүлүү туонатыгар XV үбүлүөйдээх Олоҥхо ыһыаҕа ыытыллара 4 ый кэриҥэ хаалла. Ол курдук, саха омук уруйдуур-айхаллыыр, сомоҕолоһор улахан тэрээһинэ бэс ыйын 19 күнүгэр күн көрсүүтүттэн саҕаланан, бэс ыйын 20-21 күннэригэр ыытыллыаҕа. Аламай күммүт ойон тахсыбыт түгэниттэн, оһуохай үҥкүү оройуттан тутуллан, тохтоло суох ыытыллан, ыһыах сүрүн чааһа саҕаланан барыахтаах.

Бу хаалбыт кылгас кэрчик кэмҥэ улууска ыһыахха бэлэмнэнии үлэтин сүрүн түһүмэхтэригэр күүстээх болҕомто туһаайыллан, үлэ өрө күргүөмнээхтик ыытыллан барыахтаах.

Улууспут салалтата көҕүлээһининэн Олоҥхо ыһыаҕын тэрээһинигэр анал дириэксийэ тэрилиннэ. Манна салайааччынан улахан тэрээһиннэри үгүстүк тэрийсибит баай уопуттаах биир дойдулаахпыт, Саха өрөспүүбүлүкэтин култуураҕа уонна духуобунай сайдыыга министиэристибэтин Геокультурнай сайдыы институтун салаатын салайааччыта Сардаана Семеновна Брызгалова ананна.

Сардаана Семеновна бу күннэргэ кэлэн, үлэни-хамнаһы кытта билсэн, инники үлэни торумнаста.

Дириэксийэ үлэтэ улууска Олоҥхо ыһыаҕын тэрээһинигэр сүрүн эппиэттээх үлэлээх култуура үлэһиттэрин кытта сүбэ мунньахтан саҕаланна. Кини быйылгы Үөһээ Бүлүүгэ ыһыллар Саха АССР төрүттэммитэ 100 сыллаах үбүлүөйдээх ыһыахха бары өттүттэн, ордук өрөспүүбүлүкэ салалтатыттан ураты болҕомто туһаайыллар диэн тоһоҕолоото. Итиэннэ быйылгы үбүлүөйдээх ыһыахха «Фестиваль Шедевров Олоҥхо» диэн араас омук кыттыылаах улахан тэрээһин былааннанарынан, үлэ таһыма үрдүк көрдөрүүлээх буолуохтаах диэтэ.

Улуустааҕы култуура уонна духуобунай сайдыы департаменын салайааччыта Сардаана Сергеевна Петрова ыһыах тэрээһинин үлэтигэр анал хамыыһыйалар тэриллэннэр, улуус үрдүнэн бэлэмнэнии үлэ саҕаламмытын туһунан эттэ. Кини улууспут иһигэр бу анал хамыыһыйалары сүрүннүүр, дириэксийэ састаабын таларбыт наадалааҕын ыйда. Онон Олоҥхо ыһыаҕын тэрээһинигэр эппиэттээх 10 киһилээх улуустааҕы дириэксийэ састааба талылынна.

Улуус баһылыгын социальнай боппуруостарга солбуйааччы Люция Спиридоновна Тойтонова улуус бары нэһилиэктэрэ бэлэмнэнии үлэлэргэ көхтөөхтүк кыттан үлэлииллэрин хайҕаата. Култуура үлэһиттэрин сугулаана ыалдьыттары көрсүү, түһэрии, арыаллааһын, култуурунай бырагыраамма, сырдатыы курдук боппуруостары таарыйда.

Салгыы тэрийэр бөлөх улуустааҕы үөрэх салалтатын кытта ыалдьыттары түһэрии, оҕолору лааҕырынан хааччыйыы курдук биир тутаах боппуруостары ырытыстылар. Улуус баһылыгын уонна салайар аппаратын кытта көрсөн, ыһыах ыһыллар Түгэхтэй алааһын көрөн-истэн, ыһыах концепциятыгар тохтоотулар. Бу ыһыахха биһиги улуус уратыта чорбойон көстүөхтээҕин дириэксийэ салайааччыта Сардаана Семёновна этэр.

Быйылгы Олоҥхо ыһыаҕар үгүс тэрээһиннэр бэлэмнэнэ сылдьаллар. Олор истэригэр биир сонун бырайыагынан, Саха АССР тэриллибитэ 100 сылын чэрчитинэн, «Олоҥхо суола» диэн бырайыак оҥоһулла сылдьара буолар. Ол курдук, ыалдьыттарга Олоҥхо ыһыаҕын тыына Дьокуускай куораттан айаннаан кэлииттэн саҕаланыахтаах диэн тэрийээччилэр былаанныыллар. Бырайыак чэрчитинэн, ыһыах ыалдьыттара Үөһээ Бүлүүгэ айаннаан иһэн, холобура, Олоҥхо суолун биир тохтобулугар, Горнай улууһун Софрон уонна Семен Даниловтар ааттарынан Духуобунас киинигэр сылдьан, сынньанан ааһыахтарын сөп.

Бу курдук, Үөһээ Бүлүү улууһугар Олоҥхо ыһыаҕар бэлэмнэнии үлэтэ тэтимнээхтик ыытылла турар. Тэрийэр хамыыһыйа сүрүн састааба аны кулун тутар ыйга түмсэн, сүбэ мунньах ыытыахтаах, нэһилиэктэринэн сылдьыаҕа. Олоҥхо ыһыаҕын көрсө биир тутаах тэрээһин, уус-уран оҥоһуктар «Удьуор утум» быыстапкалара аныгыскы нэдиэлэҕэ тэриллиэхтээх.

Татьяна ПОТАПОВА.

+1
0
+1
0
+1
0
+1
0
+1
0
+1
0
+1
0