Сарсыардаттан үгэс курдук
Саҕаланна ырыа-тойук…
Ырыаҕа ылланарыныы, ыһыах буолар кэтэһиилээх күнэ үүнэн, сарсыардаттан ыаллар эрдэ туран, киэргэнэн-симэнэн, Түгэхтэй алааһыгар субустулар.
Дьэ, доҕоттоор, бүгүн бүтүн Саха сирин болҕомтото бу алааска хатанна, өрөспүүбүлүкэ 100 сыллаах үбүлүөйүн биир сүрүн тэрээһинэ өбүгэ үгэһин тэҥинэн аныгы олоҕу кытары ситимнэнэр улуу дьайыыта саҕаланна!
Күннээх эрээри, сөрүүн, тыаллаах-куустаах күн буолла.
Ыһыах ыалдьыттара ыраастанан-арчыланан баран, киин тырыбынаҕа сэлэлии хааман киирэллэр. Түгэхтэй алааһын ортотугар Аал Луук Мас күөх бочур сэбирдэхтэрэ тэлибирээн, оһуора-мандара сандааран, улуутуйан турар. Үөһээ Бүлүүгэ ыытыллар Олоҥхо ыһыаҕын арыллыыта саҕаланна!
Ыҥырыллан кэлбит, өрөспүүбүлүкэбит бас-көс дьоно хотуттарын кытары бииргэ киирбиттэрэ сонун көстүү буолла. Ил Дархан Айсен Николаев кэргэнэ Людмила Валерьевналыын; Ил Түмэн бэрэссэдээтэлэ Алексей ЕРЕМЕЕВ кэргэнэ Анна Карловналыын;
Госдуумаҕа “Справедливая Россия-За Победу” фракцияны салайааччы Сергей Михайлович МИРОНОВ кэргэнэ Инна Геннадьевналыын; СӨ судаарыстыбаннай сүбэһитэ Андрей БОРИСОВ; Ил Түмэн бэрэссэдээтэлин солбуйааччы, Олоҥхо иккис 10 сылын тэрийиигэ кэмитиэт бэрэссэдээтэлэ Александр ЖИРКОВ кэргэнэ Людмила Петровналыын, Госдуума дьокутаата Федот ТУМУСОВ кэргэнэ Зоя Егоровналыын; Киргизия Өрөспүүбүлүкэтин судаарыстыбаннай сүбэһитэ Суйунбек КАСМАМБЕТОВ; Киргизия Арассыыйаҕа боломуочуйалаах посола САМАТ Гульнара-Клара; СӨ бырабыыталыстыбатын бэрэссэдээтэлин солбуйааччы, Үөһээ Бүлүүгэ Олоҥхо Ыһыаҕын тэрийэр кэмитиэтин бэрэссэдээтэлэ Сергей МЕСТНИКОВ; Үөһээ Бүлүү улууһун баһылыга Владимир ПОСКАЧИН кэргэнэ Александра Александровналыын.
Кинилэри Аал Луук Мастан 9 олоҥхоһут айхаллыы көрүстүлэр.
Үөһээ Бүлүү улууһун ытык кырдьаҕаһа Кирилл Никонович Никифоров–Лөкөчөөн »Ыһыаҕы көҥүллүүбүн!» диэтин кытары, олоҥхоһуттар Тойон Олбоххо баран олордулар.
100 Далбар Хотуттар туой иһиккэ дыргыл сыттаах боҕуруоскай отунан буруолатан, түһүлгэни ыраастаатылар.
Чэчирдэргэ салама ыйаан киэргэттилэр.
Алгысчыт күн сирин түөрт өттүгэр сүгүрүйэн баран, тойук туойан доллоһутан, Үрүҥ Айыылартан көрдөһөн амалыйар. Алгысчыттар — Трофим Васильевич Миронов, Игнатьев Василий Николаевич, Алексеев Андрей Иванович. Бу ыһыах алгыһыгар үс алгысчыт кыттыыта — Олоҥхо Ыһыаҕын уратыта.
Кымыһы иһии сиэрэ-туома ыытыллан, бастакы үс чороону ытык кырдьаҕаска К.Н.Никифоровка-Лөкөчөөҥҥө, Үөһээ Бүлүү улууһун баһылыга В.С. Поскачиҥҥа айах туттулар.
Олоҥхо Ыһыаҕын арыллыыта өссө да салҕанар.
Ангелина Васильева, »Саха сирэ» хаһыат, edersaas.ru
Хаартыскаларга Андрей Сорокин (СИА) түһэриилэрэ