Өлүөхүмэҕэ Олоҥхо ыһыаҕар СӨ Ил Дархана Айсен Николаев волонтёрдары кытта көрүстэ.
Көрсүһүү Арассыыйаҕа ыччат күнүн (үгэс быһыытынан бэс ыйын бүтэһик күнүгэр бэлиэтэнэр) чэрчитинэн ыытылынна. Ил Дархаҥҥа «Олоҥхо ыһыаҕа-2021» национальнай бырааһынньыкка үлэлиир волонтердар куорпустарын салайсар Евгений Амбросьев үлэни-хамнаһы билиһиннэрдэ. Кини волонтёрдар куорпустарын Өлүөхүмэ оройуонун дьаһалтатын ыччат бэлиитикэтигэр отдела тэрийбитин бэлиэтээтэ. Барыта 100 волонтер успуорт, култуура уонна пресс-киин хайысхаларынан үлэлииллэрин сырдатта.
Өлүөхүмэ оройуонун эдэр суруналыыстарын Лигатын салайар Ирина Янкова кэпсээбитинэн, Лига Арассыыйаҕа 50 эрэгийиэҥҥэ тэриллибит, ол иһигэр Саха сиригэр — Өлүөхүмэ оройуонугар. Сэһэргэһиигэ волонтердар Ил Дархан ыһыахха дьиэ кэргэнин үгэһин, Өлүөхүмэ улууһун сайдыытын туһунан, өрөспүүбүлүкэҕэ волонтердар хамсааһыннарыгар туох өйөбүл оҥоһулларын, о.д.а. ыйыталастылар.
Айсен Николаев волонтердарга үлэҕэ көхтөөхтүк ылсыбыттарын, төрөөбүт оройуоннарын, улуустарын туһугар көмөлөһөргө бэлэмнэрин иһин махтанна. Олохторугар уонна үөрэхтэригэр ситиһиилэри баҕарда.
Андрей Сорокин (СИА) хаартыскаҕа түһэриитэ