Олоҥхоһуттар, оһуохайдьыттар уонна уустар ый ахсын истипиэндьийэ ылыахтара
СӨ Ил Дархана Айсен Николаев Олоҥхо дьиэлэрин биир ситимниир ыйаахха илии баттаата. Ол курдук олоҥхоһуттарга, оһуохайдьыттарга, уустарга анал истипиэндьийэлэр олохтонуохтара. Маннык ис хоһоонноох ыйаахха СӨ Ил Дархана Айсен Николаев Үөһээ Бүлүү улууһугар ыытылла турар 15-с Олоҥхо ыһыаҕын аһыллыытыгар илии баттаата.
«Олоҥхо ыһыаҕа өрөспүүбүлүкэбитигэр 2006 сылтан ыытыллар. Бу сыллар усталара биһиги эпоспытын инникилиир үгүс чинчийэр, айар үлэлэр ыытыллан кэллилэр. Онон салгыы төрүт үгэспитин, норуот айар нэһилиэстибэтин сайыннарар баар баазаны хаҥатарга, күүһүрдэргэ кэмэ кэллэ. Олоҥхо дьиэлэрэ сүрүннүүр биир ситимнээх үлэни тэрийэр уонна Саха сирин култууратын аан дойду, Арассыыйа таһымыгар таһаарар буолуохтара. Дойду бэрэсидьиэнэ Владимир Путин биллэрбит Арассыыйа норуоттарын култуураларын нэһилиэстибэтин сылыгар биһиги сүрүн киллэрэр кылааппытынан буолуоҕа», — диэн бэлиэтээтэ.
Олоҥхо дьиэлэрэ улуустарга, нэһилиэктэргэ дхуобунай уонна култуурунай эйгэни сүрүннүүр кииннэринэн буолаллар. Бу улуус олохтоохторугар төрүт уус-уран айымньыны харыстыырга, илдьэ сылдьарга уонна нэһилиэнньэ олоҕор-дьаһаҕар олус наадалаах дьиэлэр буолаллар. Олоҥхо дьиэлэрин биир ситимҥэ үлэлэтии үлэ хаамыытын өссө күүһүрдүө, сайыннарыа. Ол курдук маннык биир кэлим ситимҥэ олоҥхону үөрэтэр, харыстыырга үгүс үлэлэри ыытар улуустарга баар Олоҥхо дьиэлэрэ , Арчы дьиэлэрэ, этнокултуурунай кииннэр үлэлиэхтэрэ. Бэлиэтээн эттэххэ, маннык кииннэр Олоҥхо ыһыаҕа ыытыллыбыт бары улуустарыгар бааллар. Маны сэргэ, Ил Дархан Айсен Николаев олоҥхолуур, оһуохайдыыр уонна уустарга анаан анал истипиэндьийэ олохтоото. Ол курдук уопсайа 21 киһиэхэ: сэттэ олоҥхоһукка, сэттэ оһуохайдьыкка уонна сэттэ ууска ый ахсын 30 тыһыынча солкуобай истипиэндьийэ олохтонно.
Өрөспүүбүлүкэ бүддьүөтүттэн сыл ахсын айар бырайыактары уонна Олоҥхо дьиэлэрин материальнай-тиэхиньиичэскэй баазаларын хаҥатарга үп көрүллүөҕэ.
Ульяна ЗАХАРОВА.