Култуура

«Олоҥхо» устуудьуйа ситиһиилэрэ

Дьокуускайга А.Е.Кулаковскай аатынан норуоттар доҕордоһууларын дьиэтин айар мастарыскыайын «Олоҥхо» устуудьуйата таһаарыылаахтык үлэлиир.

 

Кытайга «Жемчужина Востока» норуоттар икки ардыларынааҕы бэстибээлгэ Гран-при үрдүк аатын ылбыта, Францияҕа «Хрустальная лира» норуоттар икки ардыларынааҕы бэстибээл лауреатынан буолбута, Турцияҕа «Гез оглы», Санта Клаус уонна Чысхаан Ороһуоспатааҕы күннэрин (Финляндия, Швеция, Норвегия, Дания), Сус куоракка «Карнавал Ауссу» (Тунис), ООF Авиньоннааҕы тыйаатыр бэстибээлин (Франция) кыттыылаахтара. Маны сэргэ Франциянан, Бельгиянан, Германиянан, Польшанан гостуруолга сылдьыбыттара. Ситиһиилээх, далааһыннаах үлэлээх «Олоҥхо» устуудьуйаны куорат, өрөспүүбүлүкэ, норуоттар икки ардыларынааҕы бырайыактар ааптардара, СӨ култууратын үтүөлээх үлэһитэ Светлана Григорьевна Лукина сатабыллаахтык салайар.

«Олоҥхо» устуудьуйа 2005 сыллаахха өрөспүүбүлүкэтээҕи норуот айымньытын дьиэтигэр тэриллибитэ. Онтон ыла ситимнэнэн, сайдан, үлэтэ кэҥээн, биллэн-көстөн, болҕомтону тардара улаатан иһэр.

Быйыл, 2021 сылга, устуудьуйа айар үлэтигэр ситиһиилэр сиэттиһэн кэллилэр. Солистка Сахая Нохсорова от ыйын 21-23 күннэригэр Бурятияҕа ыытыллыбыт «Золотой голос Байкала» норуоттар икки ардыларынааҕы онлайн-бэстибээлгэ кыттан, В.М.Новиков-Күннүк Уурастыырап тылларыгар ырыаны  (норуот матыыба, С.М.Нохсорова аранжировката) уонна «Инагай дуун» диэн бурят ырыатын толорон (Гунги Чимитов тыллара, Анатолий Андреев музыката) «Көрөөччүлэр биһирэбиллэрэ» анал аат хаһаайкатынан буолла, 100.000 солк. харчынан бириэмийэлэннэ. Дьүүллүүр сүбэҕэ куонкуруска кыттыбыт талааннаах ырыаһыттар, элбэх дойдуттан ускуустуба диэйэтэллэрэ киирэн сыаналаатылар.

Любовь Каратаева «Золотая чайка» норуоттар икки ардыларынааҕы куонкурус «Народное пение» номинация 1 истиэпэннээх лауреатынан буолары ситистэ. Кини «Иэйии» — «Вдохновение» тойугун толордо. «Салют Победы» Арассыыйатааҕы бэстибээл-куонкуруска «Эстрадный вокал» номинацияҕа «Көрсүһүү» диэн сахалыы ырыанан 2 истиэпэннээх лауреат, «Признание таланта» Арассыыйатааҕы күөн күрэскэ «Эстраднай вокал» номинацияҕа Мирей Матье «Прости» диэн ырыатын французтуу ыллаан 3 истиэпэннээх лауреат үрдүк аатын ылла.

Марианна Романова — Тайыына, этно ырыаһыт, ааптардар уона бэйэтин тылларыгар барыта 60-тан тахса ырыалаах. «Самое красивое лицо России» норуоттар икки ардыларнааҕы күрэскэ кыттан «Королева Азии России – 2021» (муус устар 14-17 күннэрэ, Cочи) номинацияны ылбыта, ону сэргэ «Миссис Россия Земля – 2021» (бэс ыйын 9-15 күннэрэ, Абхазия)  норуоттар икки ардыларынааҕы куонкуруска «Миссис Магия» номинация хаһаайкатынан буолбута.

А.Е.Кулаковскай аатынан норуоттар доҕордоһууларын дьиэтин иллээх кэлэктиибин аатыттан кыайыылаахтары уонна «Олоҥхо» устуудьуйа кэлэктиибин ис сүрэхпититтэн эҕэрдэлиибит. Айар үлэҕитигэр ситиһиилэри, кыайыылары баҕарабыт.

Дьоҕуру, талааны билиһиннэрэр үтүө үгэс салҕана турдун, аан дойдуга доҕордуу сыһыан бөҕөргөөтүн, сир үрдэ чэлгийдин.

А.Е.Кулаковскай аатынан норуоттар доҕордоһууларын дьиэтин кэлэктиибэ

Хаартыскалар: 2gis.ru (сүрүн хаартыска), А.Е.Кулаковскай аатынан норуоттар доҕордоһууларын дьиэтин тиксэриилэрэ.

1
0