Амма Абаҕатын дьоно-сэргэтэ Олоҥхо тыйаатырыгар биллэр олоҥхоһут Устин Нохсоороп аатын иҥэрэри туруорсаллар.
«Кулун тутар 12 күнүгэр Нохсоороп аатын үйэтитии туһунан «төгүрүк остуолга» кэпсэтии кэнниттэн Олоҥхо тыйаатырыгар Устин Гаврильевич Нохсоороп аатын иҥэрэргэ резолюция ылынныбыт» — диэн Амма улууһун Абаҕа нэһилиэгин баһылыгын солбуйааччы Дария Михайлова кэпсиир.
Устин Гаврильевич Нохсоороп — олоҥхоһут, норуот ырыаһыта, тойуксут. Өрөспүүбүлүкэбит аатын 1946 сыллаахха бүтүн Арассыыйаҕа ааттатан турар — Кыайыы күнүгэр Москваҕа олоҥхолообута. Кини төрөөбүтэ 110 сылын көрсө абаҕалар Саха тыйаатырыгар Лев Толстой «Анна Каренина» арамааныгар олоҕуран испэктээк туруордулар. Ону таһынан улахан кэнсиэр көрдөрдүлэр.
Лена Андреева, edersaas.ru, Саха сирэ,