Олоҥхо эйгэтэ уонна оҕо оонньуурдара

Ааптар: 
29.11.2017
Бөлөххө киир:

Олоҥхо дьоруойдарын уобарастарыгар олоҕуран оҥоһуллубут оонньуурдарынан оҕо саадтарын, уһуйааннары хааччыйар туһунан боппуруос 2011 сыллаахтан күүскэ көтөҕүллүбүтэ. Ол түмүгэр, «Олоҥхо эйгэтэ – оҕо оонньуутугар» бырайыак уталытыллыбакка олоххо киллэриллибитэ.

edersaas.ru


Итинтэн ылата, киэҥ хабааннаах үлэ тиһиктээхтик, дириҥ хорутуулаахтык салҕанан, күн бүгүн үлэ-хамнас далааһыннанар. Куонкурустар, күрэхтэһиилэр, тэрээһиннэр тиһиктэрин быспаттар.

Маныаха бүгүн уонна сарсын, Олоҥхо декадатын чэрчитинэн, Дьокуускайга Саха сирин норуоттарын муусукаларын уонна фольклордарын мусуойугар «Олоҥхо оонньуурдара» диэн сүргэни көтөҕөр, киһини сэргэхситэр ураты истиҥ тэрээһин буола турар.

Үүнэр көлүөнэни иитиигэ туһаайыллыбыт бэртээхэй тэрээһини бу мусуой, «Арылы кустук» үөрэтэр түмсүү, национальнай оскуолалар институттара тэрийбиттэр. Манна Таатта, Чурапчы, Уус Алдан улуустарыттан, Хатас бөһүөлэгиттэн оҕо саадын иитээччилэрэ, эбии үөрэхтээһин педагогтара оҥорбут оонньуурдарын эгэлгэтэ тардыллыбыта көрүөхтэн кэрэ.

Өссө ордук кэрэхсэбиллээҕэ, манна төрөппүттэр оҕолорун аҕалан быыстапка эрэ курдук көрдөрбөттөр. Манна кинилэр олоҥхоттон быһа тардыыны истэ-истэ оҕолорун оонньотуохтарын, бэйэлэрэ кытары тэҥҥэ оонньоон көрдөрүөхтэрин, күрэхтэһиэхтэрин да сөп. Аны туран, оонньуур барыта өбүгэбит олоҕун-дьаһаҕын, дьарыгын, үлэлээбит үлэтин, таҥаһын-сабын, сиэрин-туомун көрдөрөрө болҕомтону өссө күүскэ тардар. Тэрийээччилэр оҕолорго наллаан сиһилии быһаараллар, көрдөрөн биэрэллэр.  Онон кырачаан ыалдьыт күрүө-хаһаа тутуутуттан саҕалаан, сүөһүнү көрө-харайа, саха аһын астыы-үөллүү оонньуур.  Оттон тутан-хабан көрбүтэ, кини өйүгэр-санаатыгар күүскэ иҥэр. Маны сэргэ, улахан дьонтон ким баҕалаах уһуйаан иитээччилэриттэн, педагогтартан оҕо сынньалаҥын тэрийиигэ, оонньууну көҕүлээн, салайан ыытыыга бэртээхэй сүбэ-ама ылаллар, санааларын үллэстэллэр. Онтон оҕо барахсан олоҥхо оонньуурдарынан оонньоон астынар-дуоһуйар, өбүгэтэ олорон кэлбит олоҕун туһунан билии-көрүү аартыгар чиҥник үктэнэр.

Биһиги корр.,  «Саха сирэ» хаһыат,  edersaas.ru

Хаартыскалар: Саха сирин норуоттарын муусукаларын уонна фольклордарын мусуойуттан

+1
0
+1
0
+1
0
+1
0
+1
0
+1
0
+1
0