Өрөспүүбүлүкэҕэ биир саамай үчүгэй үлэлээҕинэн биллэр-көстөр Мэҥэ Хаҥалас улууһун Аллараа Бэстээхтээҕи Олоҥхо дьиэтигэр, саха героическай эпоһыгар – олоҥхо эйгэтигэр үлэлиир дьон түмсэн, сылы түмүктүүр, саҥа сылы көрсөр Дьоро күннэрин тэрийэн ыытыы үтүө үгэскэ кубулуйда. Быйылгы да тэрээһиннэрэ үрдүк таһымнаахтык ыытыллыбыт.
Ол туһунан биһиэхэ өрөспүүбүлүкэтээҕи “Олоҥхо ассоциацията” уопсастыбаннай түмсүү I вице-бэрэсидьиэнэ Елена Протодьяконова бу курдук кэпсээтэ:
—Олоҥхо эйгэтигэр үлэлиир дьон Аллараа Бэстээххэ Олоҥхо дьиэтигэр түмсэн, итии чэйдээх сандалы тула олорон, санааларын сайа эттилэр, инникини торумнаатылар, сүбэлэстилэр-амаластылар, ырыаны-тойугу да дьиэрэттилэр. Көрсүһүүгэ Ил Түмэн спикерэ, Олоҥхо иккис уон сылын тэрийэн ыытыыга Национальнай кэмитиэт бэрэссэдээтэлэ Александр Жирков, СӨ үөрэҕин миниистирин I солбуйааччы Феодосия Габышева, Мэҥэ Хаҥалас улууһун баһылыга Николай Старостин кыттыыны ыллылар, санааларын эттилэр, соруктары туруордулар. Александр Николаевич Жирков сыл түмүгүнэн бастыҥнарга Национальнай кэмитиэт Бочуотунай грамоталарын, Олоҥхо уонна Арчы дьиэлэригэр олоҥхо персонажтарынан оҥоһуллубут куукулалары үөрүүлээх быһыыга-майгыга туттарда.
Салгыы Николай Старостин уонна өрөспүүбүлүкэтээҕи “Олоҥхо ассоциацията” уопсастыбаннай түмсүү бэрэсидьиэнэ Февронья Шишигина сыл түмүгүнэн чулуулары Махтал суруктарынан, Бочуотунай грамоталарынан наҕараадалаатылар.
Уус Алдан, Таатта, Чурапчы, Амма, Мэҥэ Хаҥалас улуустарынааҕы Олоҥхо Ассоциациятын филиаллара бэрткэ тэринэн кэлэн, эҕэрдэ тыллары эттилэр, ситиһиилэрин уонна үүммүт сылга былааннарын кэпсээтилэр, бииргэ үлэлииргэ санааларын эттилэр. Олоҥхо дьиэтигэр өйдөбүнньүк бэлэхтэрин туттардылар.
Көрсүһүү кыттыылаахтарын этиилэрэ саҥа сыллаах үлэ былааныгар киллэриллиэхтэрэ. Бу Дьоро күнү тэрийбит уонна иилээн-саҕалаан ыыппыт күндү дьоммутугар, Февронья Васильевнаҕа, Олоҥхо дьиэтин дириэктэригэр Евдокия Николаевнаҕа, күүс-көмө буолбут биир идэлээхтэрбитигэр кыттааччылар ааттарыттан истиҥ махталбытын тиэрдэбит!
Ити курдук сылы түмүктүүр, саҥа сылы көрсөр тэрээһиҥҥэ кыттыбыт дьон бука бары үүммүт сылга ийэ тыл уонна олоҥхо эйгэтин кэҥэтиигэ өссө түмсүүлээхтик, тэрээһиннээхтик үлэлииргэ сыал-сорук туруорунан, үөрэ-көтө тарҕастылар.
Татьяна МАРКОВА, «Саха сирэ» хаһыат, edersaas.ru