Кулун тутар 21-23 күннэригэр Дьокуускайга “Олоҥхо дойдутун прессата-2018” бэстибээл V төгүлүн ыытылынна. Үс күн устата Саха Өрөспүүбүлүкэтин суруналыыстара бэстибээл чэрчитинэн маастар кылаастарга, “төгүрүк остуолларга”, сэминээрдэргэ сырыттылар, доруобуйаларын көрдөрдүлэр. Суруналыыстар бу тэрээһиҥҥэ сылдьан, араас оройуоннартан кэлбит биир идэлээхтэрин көрсөллөрүн, саҥа дьону кытта билсэллэрин туохтааҕар даҕаны күүтэллэр.
edersaas.ru
“Олоҥхо дойдутун прессата” бэстибээл икки сылга биирдэ ыытыллар. Быйыл 80-ча суруналыыс тэрээһиҥҥэ кыттыыны ылла. Тэрээһини Саха Өрөспүүбүлүкэтин Суруналыыстарын сойууһа уонна СӨ Сибээһин уонна информационнай технологиятын министиэристибэтэ тэрийэн ыыттылар. Тэрийээччилэр быйылгы бэстибээл бырагырааматыгар, суруналыыстарга көмө буолар, уопут үллэстэр сэминээрдэри уонна кэпсэтиилэри элбэппиттэр. Дойду бастыҥ хаһыаттарын үлэтин туһунан Арассыыйа Суруналыыстарын сойууһун сэкирэтээрэ Владимир Касютин кэпсээбитин суруналыыстар дуоһуйа иһиттилэр. Оттон улуус хаһыаттарын сайдыытын туһунан “төгүрүк остуолга” бэчээт суруналыыстара үлэлэрин ырытыстылар. Кэпсэтиини сибээс уонна информационнай технологиятын миниистирин солбуйааччы Чокуур Гаврильев иилээн-саҕалаан ыытта. Хаһыаты сурутуу уонна аадырыска тиэрдии ымпыгын-чымпыгын туһунан “Арассыыйа Почтата” үлэһиттэрэ быһааран биэрдилэр. “Көмүс куорсун” бириэмийэ лауреата Владимир Степанов ырытыыны хайдах оҥорору кэпсээбитэ суруналыыстарга улахан көмө буолуо.
Быйыл психологическай тренинг ыытыллыбыта бэстибээл сыл аайы сайдан иһэрин бэлиэтэ. Суруналыыстар арыт-ардыгар өрөбүл күннэргэ сынньаммакка үлэлээн сылайаллар. Бу тэрээһин хас биирдии суруналыыска таһаарыылаах үлэтигэр көмө буолуо диэн бэстибээл тэрийээччитэ, Саха Өрөспүүбүлүкэтин Суруналыыстарын сойууһун бэрэссэдээтэлэ Галина Бочкарева эрэнэр.
Бэчээт дьиэтигэр суруналыыстар мунньубут кэллиэксийэлэрин көрдөрдүлэр. Идэлэрин таһынан, суруналыыстар маннык дьарыктаахтара эргиччи сайдыылаахтарын туоһута..
Маны таһынан, бэстибээл кыттыылаахтара Дьокуускай аэропордугар, «Сахатранснефтегаз» эбийиэктэригэр, “Якутск вечерний” хаһыат эрэдээксийэтигэр уонна “Якутия 24” ханаал студиятыгар экскурсиялаатылар.
Тэрээһин чэрчитинэн, суруналыыстар доруобуйаларын көрдөрдүлэр. Бэчээт дьиэтигэр кардиолог, маммолог, терапевт уонна да атын быраастар кэлэн суруналыыстар доруобуйаларын буор босхо көрөн бардылар. Маны таһынан, “Модун” спорт киинигэр суруналыыстар мас тардыһыытыгар бастыҥнары быһаарсыбыттара дьону сэргэхситтэ.
Александр Борисов, СӨ сибээһин уонна информационнай технологиятын миниистирэ:
-“Олоҥхо дойдутун прессата” бэстибээл ыытыллара үгэс буолла. Өрөспүүбүлүкэбит суруналыыстара икки сылга биирдэ кэлэн баай уопуттарынан үллэстэллэр уонна бэйэ-бэйэлэрин кытта алтыһаллар. Бэстибээлбит сыл аайы хабаана кэҥээн иһиэ диэн бигэ эрэллээхпин.
Василий Мандаров, “Олох суола” хаһыат эрэдээктэрэ:
-“Олоҥхо дойдутун прессата” бэстибээлгэ хаһыспын даҕаны кыттабын. Тэрээһин үчүгэйдик ааста. Барыта үрдүк таһымнаахтык ыытылынна. Урут эдэр суруналыыстарга билсиһии кулуубун тэрийэллэр этэ. Ону суохтаатыбыт. Билсиһии кулуубугар саҥа үлэлээн эрэр эдэр суруналыыстары кытта билсиһээччибит, сүбэ-ама биэрээччибит. Психологическай тренинг тэриллибитэ олус үчүгэй. Кэлин тренины сайыннаран биэрэллэрэ буоллар. Бу сайын от ыйын 10-11 күннэригэр Бүлүү улууһун Кыадамдатыгар эдэр суруналыыстарга аналлаах “Медиатор” диэн форум тэриллиэҕэ. Түгэнинэн туһанан, тэрээһиҥҥэ эдэр суруналыыстары ыҥырабын.
Тэрийээччилэр суруналыыстар култуурунай сынньалаҥнарын эмиэ учуоттаабыттар. Бэстибээл чэрчитинэн, “Наара суох” испэктээккэ, “Костер на ветру” киинэҕэ уонна X төгүлүн ыытыллар “Далбар Хотун” өрөспүүбүлүкэтээҕи куонкуруска сылдьан дуоһуйа астыннылар. Кыттыылаахтар олус сэргэхсийэн, элбэх саҥаны билэн бардылар. “Олоҥхо дойдутун прессата” бэстибээл сырыы аайы сайдан иһэр диэн дьон бэлиэтиир.
Николай Попов, «Саха сирэ» хаһыат, edersaas.ru