Уус Алдан улууһугар олоҥхону үйэтитиигэ, киэҥник тарҕатыыга оҕо бибилэтиэкэлэрэ, оскуолалар, бэйэлэрин баҕаларынан көмөлөһөөччүлэр бу күннэргэ ис сүрэхтэриттэн турунан үлэлииллэр, көрсүһүүлэргэ кытталлар.
Олоҥхо декадатын чэрчитинэн улуустааҕы реабилитационнай кииҥҥэ анал нэдиэлэ иһинэн оҕолорго араас хабааннаах тэрээһинэр ситиһиилээхтик ыытыллыбыттарын туһунан киин дириэктэрэ Сталина Данилова иһитиннэрдэ.
—“Олоҥхо алыптаах абылаҥа” диэн олоҥхону кытта билсиһии күнэ олус үчүгэйдик буолла. Бу күн оҕолор сарсыардаттан сахалыы сайбаччы таҥнан-симэнэн, сүргэлэрэ улаханнык көтөҕүллэн сырыттылар, ыытыллар оонньууларга, күрэхтэһиилэргэ, ыйытыыларга хоруйдааһыҥҥа көхтөөхтүк кытыннылар. “Дьулуруйар Ньургун Боотур” олоҥхоттон быһа тардан ааҕыны сэҥээрэн иһиттилэр, кинигэни интэриэһиргээн көрдүлэр. Маны сэргэ, оҕолорго аналлаах олоҥхолору билистилэр. Оруолларынан доргуччу ааҕан улаханнык астыннылар. Элбэх ыйытыыны биэрдилэр. Салгыы сахалыы инструменнарга ис сүрэхтэриттэн иэйэн, астынан туран оонньоотулар, ыллаатылар, тойуктаатылар. Түмүккэ, тэрээһин кыттыылаахтара, ыалдьыттара бука бары маннык хабааннаах тэрээһиннэр элбэхтик ыытыллалларыгар баҕардылар.
Биһиги корр., «Саха сирэ» хаһыат, edersaas.ru