Култуура Сүрүн

“Олоҥхо дьиэтигэр» сомоҕо талаан Гавриил КОЛЕСОВ аата иҥэрилиннэ 

   Улуу Олоҥхону үйэтиппит, уһун тыыннаабыт, Аар саарга аатырдыбыт  Саха Саарына, РСФСР, Саха АССР үтүөлээх, Саха норуодунай артыыһа, П.А.Ойуунускай аатынан Судаарыстыбаннай бириэмийэ лауреата, ССРС  Суруйааччыларын сойууһун чилиэнэ Гавриил Гаврильевич КОЛЕСОВ аата, төрөөбүтэ 90 сылыгар, үтүө аата үйэтитиллибит Мэҥэ-Хаҥалас улууһун оройуоннааҕы Норуот айымньытын киинигэр «Олоҥхо дьиэтигэр» иҥэриллибитин үөрүүлээх тэрээһинэ бэҕэһээ, кулун тутар 16 күнүгэр, үрдүк таһымҥа ыытылынна.

Гавриил Гаврильевич оҕолоро, аймахтара, бииргэ үлэлээбит дьонноро, биир дойдулаахтара, суруйааччылар, артыыстар, олоҥхоһуттар, олоҥхоҕо үлэлиир, сүгүрүйэр дьон бу Аллараа Бэстээххэ буолбут тэрээһиҥҥэ мустаннар, истиҥ-иһирэх ахтыы күнүгэр кытыннылар.

—Олоҥхо дьиэтигэр  киэн туттар Улуу биир дойдулаахпыт Гавриил Гаврильевич Колесов аатын иҥэрии туһунан быйыл  кулун тутар 4 күнүгэр Мэҥэ-Хаҥалас  улууһун дьокутааттарын  33 сиэссийэтинэн бигэргэммитэ. Бүгүн үөрүүлээх тэрээһин алгыс сиэриттэн — туомуттан саҕаланна. Биир дойдулаахпыт, Аан Дархан Олоҥхону толорооччу, алгысчыт Петр Максимович Тихонов: «Гавриил Колесов, Саха киһитин ытык сыыппарата тоҕустаах эбит, төрөөбүт күнүттэн 9  күн кэннэ, Олоҥхо Дьиэтэ аанын арыйан үлэлээбитэ оруобуна 9 сылын туолуута, кини албан аатын үйэтитэн, Олоҥхо Дьиэтигэр иҥэрилиннэ», —диэн алгыһын оҥордо. Улууспут салалтата, күндү ыалдьыттарбыт, инники өттүгэр Гавриил Гаврильевич аатын үйэтитиигэ ыытыллыахтаах үлэни,  былааны ирэ-хоро кэпсэтэн, санааларын үллэһиннилэр. Тэрээһиҥҥэ улууспут дьоно-сэргэтэ көхтөөх кыттыыны ылбытыттан олус диэн үөрдүбүт.  Киэн туттар биир дойдулаахпыт ГАВРИИЛ ГАВРИЛЬЕВИЧ КОЛЕСОВ үтүө аата үйэтитиллэн, Саха сирин олохтоохторун, ыалдьыттарын  улууспут килбэйэр киинигэр, үс аартык силбэһэр сиригэр уруйдуу-айхалыы көрсүөҕэ, күн аайы аата ааттана туруоҕа!, — диэн, бу дьоһуннаах тэрээһин туһунан санаатын үллэһиннэ  Г.Г.Колесов аатынан Олоҥхо дьиэтин дириэктэрэ Евдокия ИВАНОВА.

Үөрүүлээх тэрээһини Мэҥэ-Хаҥалас улууһун баһылыгын I солбуйааччы Семен
ПОТАПОВ аста, СӨ Судаарыстыбаннай Мунньаҕын Бэрэссэдээтэлин I солбуйааччы, Олоҥхо Иккис 10 сылын тэрийэн ыытыыга  СӨ Ил Дарханын иһинэн Национальнай кэмитиэт Бэрэссэдээтэлэ А.Н. Жирков Эҕэрдэ суругун туттарда.

П.А.Ойуунускай аатынан Саха тыйаатырын дэлэгээссийэтэ

Биир дойдулаахтарын ааттарыттан, элбэхтик бииргэ алтыспыт доҕоро Матвей Васильевич Мучин, Саха академическай  тыйаатырыттан өр сыл бииргэ айымньылаахтык үлэлээбит кэллиэгэлэрэ, биллиилээх артыыстар Ефим Степанов, Герасим Васильев, Софья Баранова, Анатолий Николаев, төрөппүт оҕолоро Оксана Гавриловна, Владимир Гаврилович  Колесовтар, Суруйааччылар сойуустарыттан саха норуодунай суруйааччыта Сэмэн Тумат, биллиилээх суруйааччы Степан Сивцев-Хамалҕа, М.К.Аммосов аатынан ХИФУ бэрэпиэссэрэ,  учуонай, олоҥхону чинчийээччи Василий Илларионов,  Олоҥхо институтун салайааччыта Р.Н. Анисимов, өрөспүүбүлүкэтээҕи «Ыччат олоҥхоһут» түмсүү салайааччыта, филологическай наука кандидата Юрий Борисов, СӨ Олоҥхо Ассоциациятын бэрэсидьиэнэ Ф.В. Шишигина, вице-бэрэсидьиэн  Е.Н. Протодьяконова, Олоҥхо кииниттэн З.Г. Сысолятина, У.М. Флегонтова, СӨ Олоҥхо тыйаатырын салайааччыта М.В. Турантаева, улуус салайааччылара кыттыыны ыллылар, истиҥ-иһирэх ахтыылары оҥордулар, санаа атастастылар.

Суруйааччылар Сэмэн Тумат уонна Степан Сивцев-Хамалҕа

 

Оксана Гавриловна, Владимир Гаврилович Колесовтар

 

Олоҥхо тыйаатырын дириэктэрэ Мария Турантаева

—Саха норуотугар улахан суолталаах тэрээһин буолла. Олус элбэх киһи — Гавриил Гаврильевич сүдү талааныгар сүгүрүйээччилэр кэлбиттэрэ үөртэ. Өрөспүүбүлүкэ барыта ыра санаа оҥостубута олоххо киирдэ.  Ол туһунан дьон-сэргэ санаатын эттэ. Итиэннэ, өссө үөрүүлээҕэ – норуотугар үгүс үйэлээҕи оҥорбут Гавриил Колесов үтүө аата өрөспүүбүлүкэбитигэр баар 10  Олоҥхо дьиэлэриттэн биир саамай бастыҥ үлэлээхтэригэр – Мэҥэ-Хаҥалас улууһун Олоҥхо дьиэтигэр иҥэриллибитэ буолар!  Олоҥхо дьиэтин Евдокия Николаевна Иванова сатабыллаахтык салайар. Бүгүн манна Мэҥэ-Хаҥалас, өрөспүүбүлүкэ бастыҥ олоҥхоһуттара  Петр Максимович Тихонов, Аркадий Михайлович Захаров, Иван Алексеевич Григорьев – олоҥхо тыыннаах эйгэтин үөскэтиигэ тирэх буолар дьоммут кыттыыны ылбыттара олус үөрдэр, долгутар, — диир өрөспүүбүлүкэтээҕи “Олоҥхо ассоциацията” уопсастыбаннай тэрилтэ вице-бэрэсидьиэнэ Елена ПРОТОДЬЯКОНОВА.

 

ХХХ

Аны аҕыйах хонугунан, кулун тутар 24 күнүттэн, Олоҥхо ассоциациятын 4 улахан тэрээһиниттэн биирдэстэрэ —  Гавриил КОЛЕСОВКА аналлаах култуура эстафетата саҕаланыаҕа.  Эстафета Саха сирин 34 улууһунан ыытыллыаҕа.

Айылҕаттан айдарыылаах дьиҥнээх сомоҕо-талаан Гавриил Гаврильевич КОЛЕСОВ аатынан бириэмийэ олохтонуоҕа, кини курдук чахчы чаҕылхай, бастыҥ олоҥхону толорооччуга туттарыллыаҕа.

Оттон аны сайын бэс ыйыгар, Улуу олоҥхоһут Гавриил Колесов төрөөбүт дойдутугар Мэҥэ-Хаҥалас улууһун 1-кы Баатара нэһилиэгэр,  Бэдьимэҕэ,  10-с Олоҥхо ыһыаҕа ыытыллыаҕа, күндү ыалдьыттарын көрсүөҕэ. Үйэтитии үлэтэ салҕанар.

 

Татьяна МАРКОВА.

    

2
0
Telegram @edersaas20