«Олимпийскай суол» тутуллуо дуо?
· - Олох-дьаһах

«Олимпийскай суол» тутуллуо дуо?

Сэтинньи 26 күнүгэр сарсыарда 8 чааска Ил Дархан Айсен Николаев “Тэтим” араадьыйаҕа тахсан, дьон ыйытыытыгар хоруйдаата.

Араадьыйа эрэллээх истээччитэ Уйбаан Турантаайап кэнники сылларга суолу оҥорууга элбэх үлэ ыытылларын бэлиэтээн туран, Чурапчыга диэри үчүгэй бүрүөһүннээх суолу тутан баран, «Олимпийскай суол» диэн ааттыахха диэн этии киллэрдэ.

— Махтал! Уйбаан Турантаайабы кытары кэпсэппэтэх ырааппыт эбит. Кэнники 2 сылга “Куттала суох, хаачыстыбалаах суоллар” федеральнай бырагыраама чэрчитинэн, хаһааҥҥытааҕар да элбэх үп-харчы көрүллэн, 537 килэмиэтир усталаах федеральнай да, өрөспүүбүлүкэтээҕи, муниципальнай да суоллар тутулуннулар, өрөмүөннэннилэр. Эһиил да бу тэтиммитин, бу кээмэйбитин ыһыктыбаппыт, сыл аайы 500-түү килэмиэтир суол оҥоһулларын ситиһиэхтээхпит.

Быйыл Бүлүү суолугар Түүкээн үрэҕэр, Мииринэй-Сунтаар улуустарын холбуур, Бүлүү өрүһү туоруур муосталар тутулуннулар. “Лена”, “Умнас”, “Бүлүү” суолларга улахан кэрчиктэри аспааллааһыҥҥа үлэ-хамнас барар. Уонунан сылларга суола-ииһэ суох олорбут Кэбээйигэ бэртээхэй суол тутуллан киирэн, олохтоохтор үөрүүлэрэ муҥура суох. Урут Дьокуускайга 2-3 күн айанныыр буоллахтарына, билигин 4-6 чааһынан тиийэр буоллулар.

Арассыыйа бырабыыталыстыбатын кытары бу боппуруоска ыкса үлэлэһэбит. РФ бырабыыталыстыбатын бэрэссэдээтэлин солбуйааччы Марат Хуснуллины кытары бу туһунан кэпсэтиини ыыппыппыт. Кини Татарстаҥҥа, онтон Москваҕа үлэлээбит киһи, суол оҥоруутун үчүгэйдик билэр. Кинини кытары Москваҕа үлэлиэҕиттэн билсэбит. Дьиҥэ, суолу тутуу докумуоннары оҥоруу да өттүнэн чэпчэкитэ суох – сүүһүнэн көҥүллэтии, араас докумуон ирдэнэр. Маны муниципальнай таһымҥа улуустар, нэһилиэктэр кыайа-хото туталлара уустук. Билигин биһигини өйдөөн, ити өттүгэр чэпчэтии баран, уларыйыы киирэн, үлэбит тэтимирдэ, инникитин өссө күүһүрдүөхпүт.

Олимпийскай суол” диэн инэриэһинэй этии киирдэ. Биһиги өрөспүүбүлүкэ сайдыытыгар улахан өҥөлөөх, аатырбыт дьоммут ааттарын үйэтитэр иэстээхпит. Аатырбыт тириэньэр Куоркун, олимпиецтар кыайыыларын итинник да үйэтитиэххэ сөп. Бу боппуруоһу бырабыыталыстыба көрөрүгэр сорудахтыам, — диэн Айсен Сергеевич хоруйдаата.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

шесть − четыре =