Олимпийскай чөмпүйүөн Анна Богалий Мэҥэ Хаҥаласка ыытыллар биатлоҥҥа ыҥырар
Муус устар 3 күнүгэр Мэҥэ Хаҥалас улууһун Тарат сэлиэнньэтигэр буулдьанан ытыыга СӨ успуордун маастара, Саха АССР норуоттарын кыһыҥҥы алтыс Спартакиадатын уонна 1974 сыллааҕы «Урожай» уопсастыба биатлоҥҥа чөмпүйүөнэ Гаврил Васильевич Цыпандин-Кыырт Гаанньа бирииһигэр биатлоҥҥа күрэхтэһии ыытыллыаҕа.
Күрэхтэһии кыттааччыларын биатлоҥҥа икки төгүллээх олимпийскай чөмпүйүөн Анна Богалий эҕэрдэлээтэ уонна: «Арассыыйа сэлиэнньэлэригэр биатлон успуорт көрүҥүн быһыытынан сайдан иһэрэ олус үөрдэр. Бу маннык күрэхтэһиилэртэн SKIMIR Анна Богалий куубагын, «Азия оҕолорун» кыһыҥҥы оонньууларын саҥа кыттааччылара үүнэн-сайдан тахсыахтара диэн эрэнэбин. Мэҥэ Хаҥалас Таратыгар ыытыллар күрэхтэһиигэ кыттыҥ, спортсменнары өйөөҥ, оҕолоргутугар көрдөрүҥ! Саха сиригэр билигин биатлон саҥаттаан сайдан эрэр дии саныыбын».
Таракка бу күрэхтэһии биатлону сайыннарар, тарҕатар, доруобуйаны бөҕөргөтөр, нэһилиэнньэни успуордунан дьарыктанарга көҕүлүүр, спортсменнар маастарыстыбаларын үрдэтэр, бастыҥнары быһаарар сыаллаах-соруктаах ыытыллар. Манна 2004-2007 сыллаах уолаттар, кыргыттар, 2003-1982, 1981-1967 сыллаах эр дьон, дьахталлар уонна бэтэрээннэр спринт, эстафета көрүҥнэргэ илин-кэлин түсүһүөхтэрэ.
edersaas.ru