Уопсастыба Успуорт

Коркин түһүлгэтигэр олимпиецтар хотторуу хомолтотун биллилэр

Дмитрий Коркин турнирын иккис күнүгэр 70 киилэҕэ диэри ыйааһыҥҥа олимпийскай чөмпүйүөн Сослан Рамонов уонна эмиэ Риотааҕы Олимпиада боруонса призера Ихитор Наврузов финал аҥарыгар хотторуу хомолтотун биллилэр.

Бу иннинээҕи хапсыһыыларыгар олимпиецтар утарылаһааччыларын улахан таһаҕас оҥостубакка кыайталаабыттара. Ол бэйэлэрэ финал аҥарыгар кэлэн, Наврузов монгол Бат-Эрдэнэ Бямбадоржка, оттон Рамонов Бурятия тустуугар Евгений Жербаевка кыайтардылар. Өскөтө, узбек монголга хатыһыылаах хапсыһыыга 10:11 ахсаанынан сабырыйтарбыт буоллаҕына, Рамонов утарылаһааччытыттан биир да очукуону кыайан ылбата — 0:8 ахсаанынан баһыйтарда.

Итинэн Жербаев Рамоновтан соторутааҕыта дойду чөмпүйэнээтигэр хотторуутун иэстэспит курдук буолла уонна Дмитрий Коркин турнирын үс төгүллээх кыайыылааҕа буолар ыра санаатыгар дьоһун хардыыны оҥордо.

Онон сарсын 70 киилэҕэ диэри ыйааһыҥҥа кыайыылааҕы быһаарар хапсыһыыга монгол уонна бүрээт күөн көрсүөхтэрэ. Оттон Наврузовтаах Рамонов боруонса иһин киирсиэхтэрэ.

Роман Попов, edersaas.ru

Ааптар хаартыскаҕа түһэриитэ.

0
0
Telegram @edersaas20

Добавить комментарий