Хотугулуу-Илиҥҥи федеральнай университекка киирэргэ араас интеллектуальнай куонкурустарга, олимпиадаларга, научнай-практическай кэмпириэнсийэлэргэ кыттыы иһин эбии баал туһунан кэпсээтилэр.
edersaas.ru
Өскөтүн биир кэлим эксээмэн (ЕГЭ) туһунан барыта өйдөнөр эбит буоллаҕына, тус ситиһии иһин эбии баал туһунан төрөппүттэр да, оскуоланы бүтэрээччилэр даҕаны үгүстүк туоһулаһаллар. “10 баал Үөрэнээччилэр хотугулуу-илиҥҥи олимпиадаларын (СВОШ) кыайыылааҕар эбиллэр. Олимпиада быйыл 19 биридимиэккэ уонна профилларынан, ол иһигэр филология, экология, медицинэ, о.д.а. хайысхаларынан буолуоҕа. Сүүмэрдиир түһүмэх сэтинньигэ саҕаланар, түмүктүүр – кулун тутарга. Эмиэ итиччэ баал Бүтүн Арассыыйатааҕы үөрэнээччилэр олимпиадаларын, норуоттар икки ардыларынааҕы “Туймаада”, ХИФУ Арктикатааҕы, “Газпром” салаатын үөрэнээччилэргэ, о.д.а. олимпиадаларын дипломун иһин ааҕыллар. Биэскэ диэри баалы урукку сылларга бүтэрбиттэр “Технологическай предпринимательство” олимпиада уонна ХИФУ үөрэҕин салааларын олимпиадаларын дипломаннарыгар ааҕыллар”, — диэн быһаардылар.
Итини таһынан, “Инникигэ хардыы” научнай-практическай кэмпириэнсийэ дипломун лауреата эбии 10 баалга суоттаныан сөп. Ол курдук, I истиэпэҥҥэ – 5 баал, II-с уонна III-с истиэпэннэргэ 3 баал. “Маныаха биири өйдүүр булгуччулаах, олимпиадаларга уонна кэмпириэнсийэлэргэ кыттыбыт үлэҥ тиэмэтэ киириэхтээх бакылтыатыҥ эбэтэр институтуҥ хайысхатыгар сөп түбэһиэхтээх”, — диэн исписэлиистэр чопчулаатылар. Итини сэргэ, баалы атын тус ситиһиилэринэн ылыахха сөп: түмүктүүр өйтөн суруйууну ситиһиилээхтик суруйан, туйгунунан бүтэрбит аттестааттаах, спортивнай ситиһиилэрдээх буоллахха, о.д.а. толору испииһэги ХИФУ Киин тутар хамыыһыйатын саайтыгар көрүөххэ сөп. Сорох оскуоланы бүтэрээччилэр Хотугулуу-Илиҥҥи федеральнай университекка туох даҕаны эксээмэнэ суох киириэхтэрин сөп. “Үөрэнээччилэр олимпиадаларын Арассыыйатааҕы сэбиэтин (РСОШ) испииһэгэр киирбит олимпиадалар дипломаннара үөрэххэ киирэр тургутуута суох киириэхтэрин эбэтэр уопсай үөрэхтээһин эксээмэнин 100 баалга туттарбыкка тэҥнээх буолуохтарын сөп (өскөтүн олимпиадаҕа сөп түбэһэр биридимиэттэригэр 75 баалтан итэҕэ суох баалы ылбыт түгэннэригэр). 2018-2019 үөрэх дьылыгар Үөрэнээччилэр олимпиадаларын Арассыыйатааҕы сэбиэтин испииһэгэр дойду үрдүк үөрэхтэрин 72 олимпиадата киирэ сылдьар. Итиннэ ХИФУ Үөрэнээччилэр хотугулуу-илиҥҥи олимпиадаларын филологияҕа профиля (нуучча тыла уонна литэрэтиирэтэ) эмиэ киирэ сылдьар”, — диэн үрдүк үөрэх иннинээҕи профориентация бакылтыата иһитиннэрэр. Олимпиада болдьоҕун уонна усулуобуйатын туһунан сиһилии саайтан билсиэххитин сөп.
Майя АКИМОВА, ХИФУ пресс-сулууспата.