Ольга Балабкина: «Быһыыны ылыыны тэтимирдиэх»

Бөлөххө киир:

СӨ бырабыыталыстыбатын бэрэссэдээтэлин солбуйааччы Ольга Балабкина COVID-19 дьаҥын салгыы тарҕаппат сыалтан туох миэрэлэри ылыахха сөбүн балаҕан ыйын 13 күнүгэр ыытыллыбыт мунньах кэмигэр иһитиннэрдэ.

Ольга Валерьевна бэлиэтииринэн, Саха сиригэр балаҕан ыйын 6-12 күннэригэр 1085 киһи дьаҥнаабыт. Ааспыт нэдиэлэни кытары тэҥнээтэххэ, ити көрдөрүү 7 % үрдүк. Дьокуускай куоракка 7,9 %, улуустарга 5,8 % ыалдьыбыт киһи ахсаана эбиллибитэ бэлиэтэммит.

Вице-премьер этэринэн, дьаҥнаабыт киһи ахсаана эбиллиитэ дьоннор уоппускаларын кэмигэр өрөспүүбүлүкэ иһигэр, Арассыыйа атын эрэгийиэннэригэр, тас дойдуга баран кэлиилэрин, оскуолаҕа, оҕо саадыгар үөрэх дьыла саҕаламмытын кытары сибээстээх. Ону таһынан быһыыны аҕыйах киһи ылбыт улуустарыгар, ойуур баһаара барбыт сирдэригэр дьаҥ-дьаһах тарҕаммыт.

“Билигин ити улуустарга быһыыны-майгыны күүскэ хонтуруоллуу олороллор. Ол эрээри дьаҥы салгыы тарҕаппат туһугар туһааннаах миэрэлэри ылыныахпытын наада”, – диэн бэлиэтиир Ольга Балабкина.

Роспотребнадзор Саха сиринээҕи управлениетын салайааччы Маргарита Игнатьева иһитиннэрбитинэн, нэһилиэнньэҕэ быһыыны биэриини элбэппиттэр. Кини этэринэн, тумууттан быһыыны ылыы хайаатар да барыахтаах, ону сэргэ дьон-сэргэ мустар сиригэр маасканы кэтии булгуччулаах буолуохтаах. Манна даҕатан, доруобуйа харыстабылын миниистирин бастакы солбуйааччы Роман Саввин Дьокуускай куоракка, ону таһынан сорох улуустарга дьаҥнаабыт дьоҥҥо анаан балыыһаларга өссө эбии миэстэ көрүллүбүтүн туһунан иһитиннэрдэ.

Мунньах түмүгэр Ольга Балабкина билигин быһыыны ылыы эрэ дьаҥтан-дьаһахтан көмүскүүр кыахтааҕын иһитиннэрэн туран, өрөспүүбүлүкэ “Спутник Лайт” вакцинанан хааччыллан олорорун, ханна быһыыны ылыы түргэн тэтимнээх барар да, онно ыарыы турбатын, быһыыны ылбыт киһи дьаҕы чэпчэкитик аһарынарын бэлиэтээн эттэ.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0