Сыл саҥатыгар “Амма кырдалын ыччата” СӨ култууратын үтүөлээх үлэһитэ, СӨ “Саха-Азия оҕолоро” пуонда стипендиата, СӨ айылҕа харыстабылын туйгуна Ольга Иванова-Сидоркевич 85 сыллаах үбүлүөйүгэр анаммыт III региональнай вокальнай ырыа күрэҕин тэрийэн ыытта.
Елена ПОТОЦКАЯ, «Саха сирэ» хаhыат, edersaas.ru
Тэрээһин Ыччат сылыгар уонна Экология сылыгар анаабыт курдук ис хоһоонноох барда. Маныаха “Амма кырдалын ыччата” уопсастыбаннай тэрилтэ доҕотторо: СӨ Дьахталларын Сойууһа, “Амма улууһа” МТ, “Леди Арктик” дьахталлар социальнай көҕүлээһиннэрин уопсастыбаннай пуондалара, «Хикари» туристическай фирма, “Лиидэр кыргыттар” уопсастыбаннай хамсааһын, В.А. Босиков аатынан Муусука үрдүкү оскуолата, О.П. Иванова-Сидоркевич аатынан Амматааҕы Оҕо айымньытын киинэ бары кыттыһан бэртээхэй бырааһынньыгы тэрийдилэр.
«Тэрээһин биир эрэ күн буолбакка, хас да түһүмэҕинэн барда. Ол курдук, бастакы сүүмэрдээһин от ыйын 18 күнүгэр Таатта Чычымаҕар өрөспүүбүлүкэтээҕи “Амма кырдалын ыччата” форумҥа ыытыллыбыта. Иккис сүүмэрдиир күөн күрэс сэтинньигэ буолбута. Ол онтон сүүмэрдэнэн 10 финалист кытынна. Кыайыылааҕынан, Гран-при хаһаайкатынан Таатта Чымнаайытыттан Александра Мохначевская буолла», — диэн кэпсиир “Амма кырдалын ыччата” ыччат уопсастыбаннай тэрилтэтин салайааччыта Саргылаана Неустроева.
Онон тапталлаах ырыаһыппыт Ольга Иванова-Сидоркевич 85 сыллаах үбүлүөйүгэр анаммыт бастакы тэрээһин ыччаттары “уһугуннарда”.
Елена ПОТОЦКАЯ, «Саха сирэ» хаhыат, edersaas.ru