Ольба Балабкина СӨ бырабыыталыстыбатын бэрэссэдээтэлин солбуйааччынан бигэргэннэ. Бүгүн Ил Түмэн иккис пленарнай мунньаҕар норуот дьокутааттара Ил Дархан Айсен Николаев киллэрбит кандидатуратыгар сөбүлэһэллэрин биллэрдилэр.
Ольга Валерьевна бу дуоһунаска ананыан иннинэ Ил Түмэн бэрэссэдээтэлин солбуйааччынан үлэлии олорбута. Парламеҥҥа наука, үөрэх, култуура, информацияны киэҥник тарҕатар сириэстибэлэр, уопсастыбаннай түмсүүлэр, дьиэ кэргэн, ыччат, социальнай харыстабыл, спорт, доруобуйа харыстабылын боппуруостарын көрөр сис кэмитиэттэри салайбыта. Төрдүс, бэһис ыҥырыылаах Ил Түмэн дьокутаата. Бэйэтэ юрист идэлээх. Саҥа дуоһунаһыгар кини социальнай эйгэни иилээн-саҕалаан илдьэ сылдьыаҕа.
Ыспыраапка:
Балабкина Ольга Валерьевна
1969 с. от ыйын 4 күнүгэр Алдан оройуонун Аллараа Куранах бөһүөлэгэр төрөөбүтэ;
1986-1988 сс. – Алданнааҕы норуот суутугар үлэлээбитэ;
1988-1993 сс. – Саха судаарыстыбаннай университетын устудьуона;
1991-1997 сс. – Юстиция министиэристибэтин исписэлииһэ, кылаабынай исписэлииһэ;
1997-1998 сс. – СӨ бэрэсидьиэнин, бырабыыталыстыбатын аппараттарыгар старшай референт;
1998-2002 сс. – Ыччат миниистирин солбуйааччы;
2002-2005 сс. СӨ бэрэсидьиэнин уонна бырабыыталыстыбатын дьаһалтатын отделын, департаменын салайааччылара;
2005-2008 сс. – “Сургутнефтегаз” ААУо юристконсультана;
2008-2013 сс. – Ил Түмэн сис кэмитиэтин бэрэссэдээтэлэ;
2013-2018 сс. – Ил Түмэн бэрэссэдээтэлин солбуйааччы.
Аграфена КУЗЬМИНА, “Саха сирэ” хаһыат.