Бүгүн суһал ыстаап мунньаҕын түмүгүнэн, СӨ Бырабыыталыстыбатын бэрэссэдээтэлин солбуйааччы Ольга Балабкина Дьокуускай куораты таһынан Мэҥэ Хаҥаласка, Тааттаҕа, Ленскэйгэ, Алдаҥҥа балаһыанньа уустугун иһитиннэрдэ.
Билиҥҥи туругунан, өрөспүүбүлүкэ үрдүнэн хас күн аайы 200-тэн тахса киһи COVID-19 дьаҥар ылларар. Холобур, ааспыт сууккаҕа 238 киһи ыалдьыбыта бэлиэтэммит. Ол иһигэр Дьокуускайга – 125, Тааттаҕа – 12, Мэҥэ Хаҥаласка – 11, Алдаҥҥа, Ленскэйгэ – 9, Сунтаарга – 8, Кэбээйигэ – 6, Аммаҕа, Бүлүүгэ, Намҥа – 5, Булуҥҥа, Мирнэйгэ, Томпоҕо, Чурапчыга – 4, Дьааҥыга, Нерюнгрига, Аллараа Халымаҕа, Өймөкөөҥҥө, Уус Майаҕа, Хаҥаласка – 3, Үөһээ Бүлүүгэ, Горнайга, Орто Халымаҕа – 2, Үөһээ Халымаҕа, Уус Алдаҥҥа, Эбээн Бытантайга биирдии киһи ыалдьыбыт.
Билигин Саха сирин үрдүнэн 160 киһи ыарахан туруктаах сытар. Кинилэртэн иккитэ оҕо. 37 киһи тыҥаны хачайдыыр искусственнай аппараакка холбоммуттар.
Вице-премьер этэринэн, кэлиҥҥи күннэргэ Мэҥэ Хаҥаласка, Тааттаҕа балаһыанньа уустук. Ону сэргэ Ленскэйгэ, Алдаҥҥа элбэх үлэһит кэлбитинэн, ыарыы күүскэ тарҕамыт. Ол оннугар Сунтаар улууһугар ыарыы тарҕаныыта аҕыйаабыт.
Ольга Валерьевна кэлиҥҥи кэмҥэ оҕолор уонна 60-тан үөһээ саастаах дьон күүскэ ыалдьалларын бэлиэтиир. “Билигин ыалдьыбыт дьон ахсааныттан 20 % оҕолор ылаллар. Ону таһынан 60-тан саастаах дьоммут ыалдьаллара элбээтэ. Холобур, бу ыарыыттан 100 киһи өлбүт буоллаҕына, 86 % саастаах дьоннор. Ити быһыы ылбатахтарын түмүгэр тахсар”, – диэн этэр кини.
Саха сирин үрдүнэн билигин 357,3 тыһыынча киһи быһыы бастакы түһүмэҕин ылан олорор. Иккис быһыыны 336,3 киһи ылбыт. Тумууну утары 86 тыһыынча киһи быһыыны ылбыт. Ити нэһилиэнньэ 9 % ылар.
– Бу көрдөрүү олус намыһах. Өскөтүн биһиги быһыыны ылбатахпытына ыарыы тарҕанан бара туруоҕа. Онон чугас дьоммутун харыстыыр сыалтан бары быһыыны ылыаҕыҥ, – диэн ыҥырар вице-премьер.
Билигин Дьокуускайдааҕы санитарнай-эпидемиологическай хамыыһыйа быһаарыытынан, харантыын уһатыллар боппуруоһа турар. Санатан эттэххэ, алтынньы 8 күнүгэр диэри оскуолаларга харантыын биллэриллибитэ. Ону сэргэ Ил Дархан ыйааҕынан билигин хааччахтыыр миэрэлэр алтынньы 31 күнүгэр диэри уһатыллан тураллар.
Аграфена КУЗЬМИНА.