Бүгүн, балаҕан ыйын 18 күнүгэр, Саха сирин Бырабыыталыстыбатын бэрэссэдээтэлин солбуйааччы Ольга Балабкина эрэгийиэҥҥэ коронавирус балаһыанньатын туһунан брифинг ыытта.
edersaas.ru
—СӨ Ил Дархана Айсен Николаев дьаһалынан, бэйэни хааччахтаныы эрэсиимэ алтынньы бастакы күнүгэр диэри уһатылынна. Ол эрээри, култуура сорох эбийиэктэрэ үлэлэрин саҕалыахтаахтар. Этиллибит санитарнай нуормалары тутуһан үлэлиэхтэрэ диэн эрэнэбит.
Ааспыт сууккаҕа 67 киһи коронавирустаата. Олортон 32 киһи Дьокуускай куоракка олорор, 35 — улуустарга.
Ордук аҕам саастаах дьон ыарыыны ыараханнык аһарыналлара бэлиэтэнэн турар. Онон, Ил Дархан алта уон биэстэриттэн үөһэ саастаахтары уонна дьарҕа ыарыылаах дьону үлэлэтэр тэрилтэлэр улахан эппиэтинэһи сүгүөхтээхтэрин туһунан тоһоҕолоон эттэ.
Бу нэдиэлэҕэ Саха Өрөспүүбүлүкэтигэр коронавируһу утары вакцина кэлиэхтээх. Бүгүн киэһээҥҥэ диэри РФ Доруобуйа харыстабылын министиэристибэтин кытары сөбүлэҥ түһэрсиэхтээхпит. Ону таһынан, бу министиэристибэни кытары эбии ИВЛ аппарааттарын аҕалыы туһунан сөбүлэҥҥэ илии баттанна.