Доруобуйа

Ольга Балабкина: «Уоппускаттан кэлээччилэр бэйэни хааччахтаныы эрэсиимин тутуһуҥ!»

Өрөспүүбүлүкэҕэ коронавирус тарҕаныытын утары тэриллибит суһал ыстаап салайааччытын солбуйааччы  Ольга Балабкина дьаҥ  балаһыанньата билигин даҕаны тыҥааһыннаах буоларын туһунан  брифиҥҥэ биллэрдэ. Ааспыт күн 99 саҥа сутуллуу түгэнэ тахсыбыт, коронавирустаабыттар улахан аҥаардара Дьокуускай куорат олохтоохторо. 

Ыарыы үгүс өттө өрөспүүбүлүкэ таһыттан уоппуска кэмигэр сынньанан кэлбит дьоҥҥо көстөрүн туһунан Ольга Валерьевна бэлиэтээн эттэ:

— Уоппускаларыгар сынньанан кэлбит дьону ыарыы тарҕаныытын төрүөтэ буолбат туһугар дьиэҕэ олорон бэйэни хааччахтаныы эрэсиимин тутуһалларыгар ыҥырыам этэ – диир Балабкина.

Горнайга баһаары умуруорууга элбэх киһи көмөлөһө кэлэрэ эмиэ дьаҥы  бохсууга уустуктары үөскэтэр. Онон сибээстээн дьон санитарнай-эпидемиологическэй ирдэбиллэри кичэллээхтик тутутаһаллара эрэйиллэр. Горнайга Дьокуускайга сыбаайбаҕа ыалдьыттаан баран ыарыыга сыстан кэлбит киһи көстүбүт.

Ольга Балабкина этэринэн суһал ыстаапка үгүс Саха сирин олохтоохторо  Госуслуги порталга вакцинацияны ааспыты туоһулуур QR-код олус бытааннык кэлэрин туһунан үҥсэллэрин  эттэ:

— Эмп тэрилтэлэригэр бу үлэни төһө кыалларынан түргэтэтэллэригэр сорудах бэрилиннэ. Билигин биллэринэн, түргэн интэриниэт баар сиригэр ити кыһалҕа суоҕун кэриэтэ. Интэриниэт бытаан сиригэр кыһалҕа кырдьык баар эрээри, систиэмэ улам тупсан, бу боппруос этэҥҥэ быһаарыллара саарбаҕа суох.

edersaas.ru

Хаартыска sakha.gov.ru

0
0