Муус устар 14 күнүгэр өрөспүүбүлүкэтээҕи оперативнай ыстаап иһитиннэрэринэн, коронавируһунан ыалдьыы балаһыанньата уустугуран иһэр, тоҕо диэтэр, кэҥээн, улуустарынан тарҕанан эрэр.
edersaas.ru
Ол курдук, Дьокуускайга инфекционнай балыыһаҕа 4 киһи сытар: Нидерландыттан кэлбит дьахтар, Горнайтан сылдьар кэргэнниилэр уонна сэбиргэхтэтэн киирбит куорат олохтооҕо. Ону тэҥэ, өссө биир коронавируска күтүрэнэр киһи анаалыһа сарсын биллиэхтээх. Дьокуускайга ыарыы бастакы долгуна ааспыт курдук буолан баран, саҥа ыалдьыбыт дьонтон иккистээн күөдьүйэн таҕыста.
Алдаҥҥа ыалдьыы икки сиргэ түмүллэр – атын эрэгийиэнтэн кэлбит киһи ырыынакка сылдьыбытын түмүгэр, кимниин хантаактаспыта быһаарыллар. Ырыынак дириэктэрэ эмиэ ыалдьыбыта билиннэ. Иккиһинэн, Кисловодскайтан кэлбит дьахтар, кини хантаактара – дьиэ кэргэнэ.
Ленскэйгэ – Арменияттан кэлбит кэргэнниилэр, ону тэҥэ Чайаҥдаҕа баахтанан кэлэн үлэлии сылдьар үс үлэһит ыарыйдылар. Өссө үс киһи анаалыһа бигэргэнэ илик. Бу үлэһиттэри “Газпром” анал сөмөлүөтүнэн Таалакаан аэропордуттан Ноябрьскай куоракка көтүттэ, онно эмтэнэллэр.
Бүлүү Кыадаҥдатыгар Санкт-Петербуртан эмтэнэн кэлбит биир дьахтар ыарыйда.
— Ыалдьыбыт дьону ырытан көрөн баран, сыстыһыы тарҕанар кутталлаах хантаагынан дьиэ кэргэннэрэ уонна бииргэ үлэлиир кэлиэгэлэрэ буолаллара көһүннэ. Кинилэрдиин элбэхтик алтыһабыт уонна эрэнэбит, итэҕэйэбит. Ол эрээри, сэрэхтээх буолуҥ, бэйэҕитин уонна чугас дьоҥҥутун харыстааҥ.
Доруобуйа харыстабылын министиэристибэтин ирдэбилинэн, билиҥҥи кэмҥэ тумуулаабыт, күөмэйдэрэ ыалдьыбыт, кыраадыстара үрдээбит дьон бары коронавируска анаалыс туттарыахтаахтар. Билигин өрөспүүбүлүкэҕэ 6 лаборатория үлэлиир. Сэттис лаборатория Алдаҥҥа аһыллыахтаах, — диэн Ольга Балабкина иһитиннэрдэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru