Бырабыыталыстыба бэрэссэдээтэлин солбуйааччы Ольга Балабкина бүгүн быһа эпииргэ, муус устар 7 күнүгэр, өрөспүүбүлүкэҕэ балаһыанньа хайдах туруктааҕын билиһиннэрдэ.
Аан маҥнайгынан кыһалҕата суох таһырдьа тахсыы билиҥҥи кэмҥэ табыллыбат быһыы-майгы буоларын тоһоҕолоон эттэ:
— Өрөспүүбүлүкэҕэ эпидемиологическай быһыы-майгы билигин даҕаны олус тыҥааһыннаах. Оттон Арассыыйа атын эрэгийиэннэригэр коронавирус дьаҥа бу күннэргэ эмискэ күүһүрдэ. Билэргит курдук, биһиги дойдубут атын куораттартан хайдах даҕаны хаххаламмат. Салгынынан сибээс тохтотуллара эмиэ сатаммат, син-биир дьон кэлиэхтээх, үлэ барыахтаах.
Бүгүн сорох судаарыстыбыннай уонна муниципальнай тэрилтэлэр дьоннорун таһааран үлэлэппиттэрэ иһилиннэ. Ити, маннык ыксаллаах уонна кутталлаах кэмҥэ, олох табыллыбат! Дьиэҕэ хааччахтанан олорор эрэсиим эрэ иһинэн бары кыаллар үлэлэр салҕаныахаахтар!
Ону сэргэ, Ольга Валерьевна дистанционнай үөрэх туһунан таарыйда: “Маннык эрэсииминэн үөрэх иккис күнэ барда. Кэккэ ыарахаттар бааллар. Сорох сирдэргэ интэриниэт мөлтөх, учуутал оҕолору кытта сибээстэһэрэ уустук. Туох эрэ мэһэй баар буоллаҕына, үөрэҕирии министиэристибэтин кытта сибээстэһиҥ, биллэриҥ”, — диэтэ.
Сарсыарда сөмөлүөтүнэн кэлбит температуралаах сэттэ пассажир туһунан ыйытыыга: “Аэропорка манабыл күн аайы ыытыллар. Ыалдьыбыт сибикилээх дьон тута анаалыска утаарыллаллар, хонтуруолга туруорабыт. Онон, бука диэн, дьиэҕэ хааччахтаныы эрэсиимин тутуһун!” — диэтэ.