Ольга Балабкина: “Төрөппүттэргитин харыстааҥ!”

Бөлөххө киир:

Өрөспүүбүлүкэҕэ эпидемиологическай балаһыанньа билигин да уустук. Ол туһунан суһал ыстаап салайааччытын солбуйааччы Ольга Балабкина иһитиннэрдэ.

— Коронавируһунан ыалдьыбыттар ортолоругар сааһырбыт дьон ахсаана элбээн иһэр. Билигин доруобуйа харыстабылын систиэмэтигэр, быраастарга да уустук кэм. Биллэн турар, уһун кыһын иннинэ, сайын бүтэһик сылаас күннэрин баттаһа, дьон дьиэ кэргэнинэн айылҕаҕа, даачаҕа көрсүһүүлэри тэрийиэхтэрин баҕараллара өйдөнөр.

Ол эрээри, сааһырбыт дьон оҕолоругар, сиэннэригэр туһаайан этиэм этэ – төрөппүттэргитин, эбэлэргитин-эһэлэргитин харыстааҥ! Бэйэҕит хантаактаргытын көрүнүҥ, ону тэҥэ, элбэх буолан мустартан туттунуҥ. Ийэ-аҕа, эбээ-эһээ аттыларыгар сылдьар үчүгэй, ол эрээри кинилэр уһун үйэлэнэллэрэ, доруобай, чэгиэн сылдьаллара туохтааҕар да суолталаах.

Үтүөрэн тахсыбыт дьоҥҥо туһаайан, дьоҥҥо өйдөтөр-сэрэтэр сүбэлэри биэрэллэригэр ыҥырыам этэ. Эмтэнэ сылдьар дьоҥҥо доруобуйаны баҕарабын!

Билигин ыалдьыбыт дьон балыыһаҕа киирэллэригэр уочараты олохтообот курдук үлэ ыытыллар. Олимпийскай эрэллэр училищеларын базатыгар инфекционнай стационар арыллан, арыый чэпчэкитик ыалдьыбыт дьону ылыаҕа. Ону тэҥэ, ыараханнык ыалдьыбыт дьон сытар стационардарыгар эбии миэстэлэр баар буолалларын хааччыйыахпыт, — диэн Ольга Балабкина кэпсээтэ.

Ангелина Васильева, “Саха сирэ” хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0