СӨ Бырабыыталыстыба Бэрэссэдээтэлин солбуйааччы Ольга Балабкина бэҕэһээ, сэтинньи 2 күнүгэр, Бүлүүгэ Сосновка сэлиэнньэтигэр биэссэр-акушер пуунугар сырытта. Бу кини Бүлүү эҥэр улуустарга оробуочай сырыыта.
Пуун «Доруобуйа харыстабыла» национальнай бырайыак чэрчитинэн былырыын ахсынньыга тутуллубута.
«Сыл кэриҥэ буолла. Сосновка 300 кэриҥэ олохтооҕо, ханна да барбакка, кыра да буоллар бэйэлээх бэйэлэрин нэһилиэктэригэр баар пууҥҥа көрдөрөн көмөнү ылаллар. Урут манна мэдиссиинэ тэрилтэтэ диэн төрүт суоҕа. Дьон кыһалҕаттан ньиэрбэ ыарыһахтары эмтиир Бүлүүтээҕи диспансерга эбэтэр оройуон киинигэр киирэн көрдөрөргө күһэллэллэрэ«, — диир кини.
Бу биэссэр-акушер пууна СӨ Доруобуйа харыстабылын министиэристибэтин бирикээһигэр олоҕуран, «Доруобуйа харыстабыла» национальнай бырайыагынан тутуллубута диэн СӨ Ил Дархан уонна Бырабыыталыстыба пресс-сулууспата иһитиннэрэр.
Бүлүүтээҕи киин балыыһа кылаабынай бырааһа Егор Григорьев пуун кэбиниэттэригэр нэһилиэк олохтоохторугар оҥоһуллар бастакы көмөлөр тустарынан сырдатта.
«Тыа сирдэригэр маннык аһыллыбыт пууннар дьоҥҥо-сэргэҕэ суһал көмө буолалларын сэргэ, былааннаммыт диспансеризацияны ыыталлар, доруобуйаны көрөллөр-истэллэр. Ону таһынан, быраастар улуустарынан сылдьар мобильнай биригээдэлэрэ кыра нэһилиэктэргэ маннык биэссэр-акушер пууннарыгар дьону-сэргэни көрөллөр. Манна доруобуйаны чэбдигирдиигэ туһуламмыт көрүүлэр тэриллэллэр, доруобуйаларынан хааччахтаах, кыайан хаампат дьоҥҥо көмөнү оҥороллор, көһө сылдьар мэдиссиинэ тэрилинэн бэрэбиэркэлииллэр, холобур, ФЛГ-аппарааттарыгар көрөллөр«, — диэн Ольга Балабкина оробуочай сырыы түмүгүнэн этэр.
«Сосновкатааҕы биэссэр-акушер пуунун холобуругар, судаарыстыба икки төгүллээх көмөтүн көрөбүт. Бастакытынан, мэдиссиинэ үлэһитэ манна «Земскэй фельдшер» федеральнай бырагырааманан кэлбитэ. Иккиһинэн, ФАП национальнай бырайыагынан тутуллубута. Өскөтүн манна «Демография» национальнай бырайыагынан тутуллубут Сосновкаҕа баар ньиэрбэ ыарыһахтары эмтиир Бүлүүтээҕи диспансер утуйар куорпуһун эбии киллэрдэхпитинэ, улуус аҥаардас биир Сосновка сэлиэнньэтигэр, оройуон олохтоохторун өйүүр киэҥ масштабтаах судаарыстыба өйөбүлэ оҥоһуллубутун, социальнай көмүскэл уонна доруобуйа харыстабылын тиһиктэрин көрөбүт, —диэн бэлиэтээтэ вице-премьер.
СӨ Доруобуйа харыстабылын министиэристибэтэ улуустарга аныгы үйэ ирдэбилигэр толору эппиэттиир биэссэр-акушер пууннарын уонна амбулаториялары тэрийиигэ тиһиктээх үлэтэ салҕанар.
Алтынньыга биэдэмистибэ пресс-сулууспата 2020 сылга былааннаммыт 18 биэссэр-акушер пуунуттан уонна амбулаторияттан, аҕыһа үлэҕэ киирбитин иһитиннэрэн турар. Ол курдук, биэссэр-акушер пууннара Эдьигээҥҥэ Баахынайга, Үөһээ Бүлүүгэ Тамалакааҥҥа, Томпоҕо Охотскай Перевозка, Усуйаанаҕа Дьүкээгиргэ, Орто Халымаҕа Березовкаҕа, Өлүөхүмэҕэ Урицкайга, Сунтаарга Толооҥҥо, Тааттаҕа Боробулга киллэриллибиттэрэ. Итинтэн хаалбыттара (10) Хаҥалас, Ньурба, Булуҥ, Чурапчы, Уус Алдан, Амма, Бүлүү, Мэҥэ Хаҥалас, Нам оройуоннарыгар уонна Дьокуускайга Кырдьаҕас Табаҕаҕа бу сыл бүтүөр диэри тутуллан бүтүөхтээхтэр.
Хас биирдии биэссэр-акушер пууннара мэдиссиинэ тэрилинэн уонна миэбэлинэн хааччыллаллар. Манна биэссэрдэр хосторо, процедурнайдар, көрөр-истэр, хаһаайыстыбаннай хостор баар буолаллар.
Өрөспүүбүлүкэҕэ былырыын барыта 10 биэссэр-акушер пууна уонна амбулатория: Аллайыахаҕа Русскай Устьеҕа, Аммаҕа Сулҕаччыга, Алдаҥҥа Якокит сэлиэнньэтигэр, Бүлүүгэ Сосновкаҕа, Ленскэйгэ Ярославскай нэһилиэгэр (Хаамра) уонна Инньээлигэ, Уус Алдаҥҥа Арыылаахха, Кэбээйигэр Тыайаҕа, Томпоҕо Арыы Толооҥҥо, Мэҥэ Хаҥаласка Даркылаахха тутуллан үлэлии тураллар.
2018 сыллаахха үс биэссэр-акушер пууна Кэскилгэ (Томпо), Кыһыл Дэриэбинэҕэ (Намҥа) уонна Уолбаҕа (Таатта) киирбитэ.
Доруобуйа харыстабылын миниистирэ Елена Борисова иһитиннэрбитинэн, 2019 сылтан 2020 сыл алтынньы бүтүөр диэри, өрөспүүбүлүкэҕэ барыта 18 ФАП: 8 — быйыл, 10 — 2019 сылга аанын аспыт. Бу кэнниттэн салгыы, сыл бүтүөр диэри, өссө 10 ФАП былааҥҥа баар. Оччотугар икки сылга уопсай сыыппара 28-ка тэҥнэһэр.
+1
+1
+1
+1
+1
+1
+1