Муус устар 21 күнүгэр бэрэсидьиэн Владимир Путин РФ Федеральнай Мунньаҕар туһаайан Анал этиитигэр социальнай көмө туһунан эттэ. Ол туһунан СӨ вице-премьерэ Ольга Балабкина санаатын үллэһиннэ.
— Владимир Владимирович ийэлэри, оҕолору өйүүргэ кэккэ саҥа миэрэлэри ылынар туһунан эттэ. Мин санаабар, бу Анал этии биир сүрүн түгэнэ буолар.
Судаарыстыба социальнай хайысхалааҕын өссө төгүл бигэргэтэн, көмөҕө ордук наадыйар араҥаҕа өйөбүл миэрэлэрин элбэтэр. Ол курдук, оҕолорун соҕотоҕун иитэр уонна үп-харчы өттүнэн ыарахан балаһыанньалаах хат дьахталларга көмө көрүллүбүтэ үөрдэр.
Былырыын, бэйэни хааччахтаныы кэмигэр 28 мөлүйүөн оҕоҕо быһаччы социальнай төлөбүр кылгас кэм иһигэр ситиһиилээхтик оҥоһуллубута. Бу хайысха быйыл эмиэ салҕанар уонна кэҥиир диэн бэрэсидьиэн эттэ. Онон кэлэр үс сыл иһигэр судаарыстыбаннай уонна муниципальнай өҥөлөрү түүннэри-күнүстэри, өрөбүлэ суох үлэлиир дистанционнай көрүҥҥэ көһөрүү туһунан этиитэ билиҥҥи кэмҥэ ордук суолталаах дии саныыбын.
Онон, судаарыстыбаннай уонна муниципальнай өҥөлөрү оҥоруу систиэмэтэ судургутуйар, дьоҥҥо чугаһыыр. Бу соруктар олоххо киирдэхтэринэ, киһи уонна судаарыстыба дьайсыыларын, алтыһыыларын хаачыстыбата лаппа үрдүө диэн эрэллээхпин.
Ангелина Васильева, “Саха сирэ” хаһыат, edersaas.ru