Тохсунньу 28 күнүгэр суһал ыстаап брифинигэр Ольга Балабкина балыыһалар коронавируһу утары үлэлэрин туһунан иһитиннэрдэ.
Тымныйбыт сибикилээх ыарыһахтар маҥнайгы амбулаторнай көмөнү олохтоох эмтиир тэрилтэҕэ ылыахтарын сөп. Киин куорат олохтоохторо ону таһынан «Триумф» спорт дьиэтигэр тэриллибит амбулаторнай кииҥҥэ тиийиэхтэрин сөп. Манна биир симиэнэҕэ 40 быраас үлэлиир. Оттон төлөпүөнүнэн сүбэҕэ-амаҕа биир симиэнэҕэ 100-кэ чугаһыыр оператор олорор. Дьокуускайга ыҥырыыга сылдьар биригээдэлэр ахсааннара 252.
Үрдүк температуралаах дьон дьиэҕэ олорон 122 нүөмэргэ эрийэн быраас ыҥырыахтаахтар.
Ону таһынан Ольга Валерьевна оҕоҕо быһыыны оҥоруу саҕаламмытын туһунан эттэ. Бүгүн 17 чааска Дьокуускай куоракка Оҕо дыбарыаһыгар 12- тэн 17- гэр диэри саастаах оҕолорго көҥүл өттүнэн вакцинация саҕаланыа. Вакцина ахсаана аҕыйах буолан, билигин баҕалаахтарга барыларыгар бэриллибэт. Вакцина ылыан баҕалаахтар эрдэттэн суруттаран учаастактааҕы педиатр көрүүтүн ааһыахтаахтар. Оҕону вакцинациялыыр туһунан быһаарыыны быраас төрөппүт сөбүлэҥ суруга баар эрэ буоллаҕына ылар.
“Вакцина ылыыга маҥнайгы уочаракка “кыһыл зонаҕа” үлэлиир доруобуйа харыстабылын үлэһиттэрэ тураллар. Биһиги быраастарбытын уонна кинилэр дьиэ кэргэттэрин харыстыах тустаахпыт, кинилэр этэҥҥэ сылдьаннар биһигини ыарыыттан эмтиэхтэрэ, харыстыахтара”, — диир Ольга Балабкина.
«Саха сирэ» хаһыат, edersaas.ru
Хаартыска sakha.gov.ru