Ольга Балабкина: «Саха сиригэр быһыы ылар 39 учаастак тэрилиннэ»

Ааптар: 
Бөлөххө киир:

СӨ Бырабыыталыстыбатын бэрэссэдээтэлин солбуйааччы Ольга Балабкина бүгүн, тохсунньу 18 күнүгэр, өрөспүүбүлүкэҕэ коронавирус балаһыанньатын туһунан иһитиннэрдэ.

Суһал ыстааптан иһитиннэрбиттэринэн, бүтэһик хонукка 153 киһи коронавирустаабыта биллибит. Ол иһигэр:

Дьокуускайга 65 киһи ыалдьыбыт; Мииринэй улууһугар — 23; Алдан улууһугар — 14; Нерюнгри улууһугар — 11;

Бүлүү улууһугар — 7; Мэҥэ Хаҥалас улууһугар — 6; Амма, Булуҥ, Уус Алдан улуустарыгар — түөртүү;

Ленскэй, Өймөкөөн улуустарыгар — үстүү; Кэбээйи, Таатта, Уус Маайа улуустарыгар — иккилии; Нам, Хаҥалас, Чурапчы улуустарыгар биирдии киһи сутуллубута быһаарыллыбыт.

Ольга Валерьевна Саҥа дьыллааҕы бырааһынньыктарга түмсүүлэртэн сылтахтанан, Мииринэй, Алдан, Нерюнгри диэки коронавирус дьаҥар сутуллуу түгэннэрэ элбээбитин этэр.

Биир хонук иһигэр өрөспүүбүлүкэ лабораторияларыгар 2 тыһыынча кэриҥэ тест оҥоһуллубут. О.В.Балабкина: “Билигин коронавирус дьаҥынан ыалдьыы элбээбэтэр ханнык. Ол туһуттан, дьон доруобуйатын харыстаан, суһал ыстаап мунньаҕар миэрэлэри эбии ылар туһунан былааннаатыбыт” — диэтэ.

Тохсунньу 19 күнүгэр өрөспүүбүлүкэҕэ 1242 вакцина кэлбитин туһунан иһитиннэрдэ. Бүгүҥҥү туругунан Саха сиригэр 2,5 тыһыынча киһи коронавирустан утары быһыыны ылбыт. Өрөспүүбүлүкэ үрдүнэн быһыыны туруорарга 39 учаастак тэриллибит. Коронавирус утары быһыыны оҥоруу олохтоох поликлинкаларга сурутуу быһыытынан ыытыллар.

«Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0