Доруобуйа

Ольга Балабкина Саҥа дьыллааҕы өрөбүллэр кэмнэригэр барыыны-кэлиини былаанныырга ыҥырда

Саха сиригэр коронавирус дьаҥын утары өрөспүүбүлүкэ сиригэр-уотугар Саҥа дьыллааҕы бырааһынньыктар уонна каникул кэмигэр ыарыы тарҕанытыын бохсууга былаан ылыныллыбыта. Бу туһунан суһал ыстаап брифинин кэмигэр ахсынньы 17 күнүгэр Бырабыыталыстыба бэрэссэдээтэлин солбуйааччы Ольга Балабкина иһитиннэрдэ.

“Саҥа дьыллааҕы бырааһынньыктар уонна каникуллар кэмнэригэр кэлиигитин-барыыгытын былаанныыргытыгар ыҥырабын, бэйэҕит уонна чугас дьоҥҥут доруобуйатын харыстыыр туһуттан бары санитарнай нуормалары тутуһан”, — диэтэ вице-премьер.

Ольга Балабкина өрөспүүбүлүкэҕэ коронавируһунан ыалдьыы түгэнэ аччаабытын бэлиэтээтэ, ити санитарнай-эпидемиологическай нуормалар көдьүүстээхтэрин көрдөрөр. Роспотребнадзор Саха сиринээҕи управлениетын чахчытынан ааспыт сууккаҕа 183 ыалдьыы бэлиэтэннэ.

145 ыалдьыбыт улахан дьонтон 139-һа коронавирустан быһыыны ылбатах, ити 96% тэҥнэһэр. Стационардарга 991 киһи эмтэнэр, кинилэртэн 905 киһи – орто ыарахан туруктаах, 86 – ыарахан туруктаах, кинилэртэн 84 пациент быһыыны ылбатах.

Мэҥэ Хаҥалас, Нерюнгри, Мииринэй, Уус Алдан оройуоннарын уонна Дьокуускай куорат реанимациятын отделениеларыгар эмчиттэр 15 киһи тыыннаах хааларын туһугар туруулаһаллар.

Ааспыт сууккаҕа Нерюнгри оройуонугар суукка устата 21 түгэн бэлиэтэннэ, Алдаҥҥа – 18, Сунтаарга – 11, Мэҥэ Хаҥаласка уонна Хаҥалас улуустарыгар – 10-нуу.

Коронавирус дьаҥын утары быһыыны биэрии салҕанар. Бастакы компоненынан улахан дьон 71% быһыыны ылла. Нэһилиэнньэ улахан дьонун 90 %-тан тахсата түөрт оройуоҥҥа быһыыны туруортарда: Аллайыаха, Муома, Аллараа Дьааҥы, Орто Халыма.

80% элбэх —  Абый, Үөһээ Халыма, Эдьигээн уонна Ленскэй оройуоннарыгар. Дьокуускайга нэһилиэнньэ 75 % быһыыны ылбыта чопчуланна.

60 % аҕыйах киһи Чурапчы улууһугар быһыыны ылбыта биллэр. Оройуон салалтатыгар быһыыны биэриини тэтимирдэргэ сорук туруорулунна, ол иһигэр быһаарар үлэни ыытарга, саҥа пууннары арыйарга.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Андрей Сорокин түһэриитэ

Бэлэмнээтэ Женни Стрюкова

0
0
Telegram @edersaas20