Ольга Балабкина: «Үөрэх дьылын көрсө ураты сэрэхтээх буолар ирдэнэр»

Бүгүн сарсыарда 12 чааска Бырабыыталыстыба Бэрэссэдээтэлин солбуйааччы Ольга Балабкина коронавирус туругун туһунан ыыппыт брифинигэр үөрэх дьылын көрсө ураты сэрэхтээх буоларга ыҥырда.

edersaas.ru

Ааспыт сууккаҕа өрөспүүбүлүкэ үрдүнэн 56 киһи дьаҥҥа хаптарбыта биллибит. Ыалдьыбыт дьонтон 43 киһи киин куорат, уон үс киһи улуустар (Мэҥэ Хаҥалас, Мииринэй, Нам, Нерюнгрин, Сунтаар уонна Чурапчы) олохтоохторо буолаллар. Ыалдьыбыт дьон изоляцияланнылар, кинилэр алтыспыт дьонноро быһаарыллан, хонтуруолга ылылыннылар. Суукка устатыгар 3 000 чинчийии оҥоһуллар. Дьаҥ туруоҕуттан барыта 333 132 анаалыс оҥоһуллан, бэрэбиэркэлэммит. Ыарыы ордук сааһырбыт уонна архана ыарыылаах дьону булар, онон, дьиэ кэргэн да, кэлэктиип да иһинэн хааччахтыыр дьаһаллары тутуһар, бэйэни да, аттынааҕы дьону да харыстыыр ирдэнэрин өссө төгүл санатабыт. Уопсастыбаннай сиргэ мааскалаах сылдьыахха, ирдэнэр тэйиччини тутуһуохха, дезинфекциялыыр үлэни мөлтөтүмүөххэ наада. Киһи тус бэйэтэ эппиэтинэстээх буолуохтаах, илиитин сууна сылдьыахтаах, дьонноох сиргэ мааска кэтиэхтээх.

– Кэлиҥҥи икки нэдиэлэҕэ ураты сэрэхтээх буолар, харыстанар дьаһаллары кытаанахтык тутуһар ирдэнэр, – диэтэ Ольга Валериевна. – Уоппускаларын кэмигэр соҕуруу, атын эргийиэннэргэ сылдьыбыт итиэннэ улуустарга сайылыы, оттуу тахсыбыт дьоннор, оҕолор куоракка кэлэллэригэр, санитарнай-эпидемиологическай дьаһаллары кытаанахтык тутуһуохтаахтар. Билигин, саҥа үөрэх дьыла аһылларыгар, Билии күнүн көрсө, бары оскуолалары санитарнай-эпидемиологическай эрэсииминэн хааччыйар үлэ ыытыллар. Үөрэх министиэристибэтэ Доруобуйа харыстабылын министиэристибэтин кытары сөбүлэһэннэр, үөрэх дьылын икки бастакы нэдиэлэтигэр бары иитэр-үөрэтэр тэрилтэлэргэ медицина нэдиэлэтин тэрийэргэ быһаардылар. Онон, дьаҥ тарҕаныыта тахсыбатын туһугар, эмп үлэһиттэрэ бу икки нэдиэлэ устатыгар оскуолаларга тиийэннэр, сэрэтэр-эмтиир дьаһаллары тэрийиэхтэрэ.

Раиса Сибирякова, «Саха сирэ» edersaas.ru