Ольга Балабкина: «От ыйын 1 күнүттэн коронавируһунан ыалдьыбыттар диспансеризацияланар кыахтаныахтара»

Ааптар: 
Бөлөххө киир:

СӨ Бырабыыталыстыбатын бэрэссэдээтэлин солбуйааччы Ольга Балабкина бүгүн, от ыйын 2 күнүгэр, Суһал ыстаап брифинин ыытта.

Коронавирус тарҕаныытын туһунан тиһэх чахчылары сырдата туран, Ольга Валерьевна Эдьигээҥҥэ биир күн иһигэр ыарыыга 10 киһи сутуллубутун туһунан тоһоҕолоон эттэ. Сутуллубут дьон бары хааччахтаммыттар, ыарыы тарҕаныыта бохсуллубут. Ыарыы бу күҥҥэ тарҕамматах икки улууһун – Өймөкөөн уонна Кэбээйи улуустарын суһал ыстааптарыгар уонна олохтоохторугар социальнай дистанцияны тутуһууну ыһыктыбаттарыгар ыҥырда. Ону таһынан вакцинаны көхтөөхтүк ылар олус көдьүүстээҕин ыйда.

Улуустарга вакцинаны тарҕатыы көхтөөхтүк бара турарын Ольга Валерьевна хайҕаан бэлиэтээтэ.

— Бу күҥҥэ сорох улуустар вакциналааһыҥҥа былааннарын толору ситиспиттэр. Оттон сорохторго нэилиэнньэ 50% тиийбэт киһи быһыыны ылбыт. Улуустарга бу күннэргэ «ЭпиВакКорона» вакцина тиэйиллэ турар. От ыйын 7 күнүгэр бары улуустарга бу вакцина тиийиэҕэ.

Бу күҥҥэ өрөспүүбүлүкэҕэ 268 037 доза «ЭпиВакКорона» уонна «Спутник» вакциналар кэлбиттэрэ биллэр.

От ыйын 1 күнүттэн коронавируһунан эрдэ ыалдьыбыт дьону диспансеризациялааһын саҕаланна. Киин балыыһаларга ыарыы содулун эмтээһин туһунан информация киирбит, Арассыыйа Доруобуйа харыстабылын министиэристибэтин кытта диспансеризацияны үбүлээһин туһунан сөбүлэҥҥэ илии баттаммыт.

Брифинг түмүгэр Ольга Балабкина өрөбүллэр иннинэ көхтөөхтүк вакцина ыларга ыҥырда.

«Саха сирэ» хаһыат, edersaas.ru

Хаартыска sakha.gov.ru

+1
0
+1
0
+1
0
+1
0
+1
0
+1
0
+1
0