Ольга Балабкина: Оҕолор ыалдьыбаттарын туһугар, төрөппүттэр быһыыны ылыҥ!
Өрөспүүбүлүкэҕэ санитарнай-эпидемиологическай быһыы-майгы тыҥааһыннаах.
Атырдьах ыйын 18 күнүнээҕи туругунан 143 киһи ыалдьыбыт. Ол иһигэр Дьокуускайга 80, Нерюнгрига 9, Сунтаарга 8, Тааттаҕа 7, Мииринэйгэ, Ньурбаҕа биэстии, Алдаҥҥа, Бүлүүгэ, Мэҥэ Хаҥаласка түөртүү, Чурапчыга 3, Өлүөхүмэҕэ, Уус Маайаҕа иккилии, Аммаҕа, Үөһээ Бүлүүгэ, Горнайга, Эдьигээҥҥэ, Кэбээйигэ, Муомаҕа, Намҥа, Өймөкөөҥҥө, Томпоҕо, Хаҥаласка биирдии киһи. Суукка устатыгар 3 310 лабораторнай чинчийии оҥоһуллубут. Бу туһунан бырабыыталыстыба бэрэссэдээтэлин солбуйааччы Ольга Балабкина иһитиннэрдэ.
Вице-премьер ыарыы дьиэ кэргэн иһигэр сыстыһыыта, оҕолор ыалдьыыларын түбэлтэлэрэ тахсарынан, санитарнай ирдэбили тутуһууну күүһүрдэрэ эттэ. Онон үөрэх дьыла саҕаланаары турарынан, оҕолор чэгиэн буолалларын туһугар, вакцинаны ылыыны күүһүрдэргэ ыҥырда.
– Өрөспүүбүлүкэ ытыктабыллаах олохтоохторо, оҕолорго быһыы бэриллибэтин билэҕит, онон оскуола, детсад оҕолоро ыалдьыбаттарын туһугар төрөппүттэр быһыыны ыларгыт олус наадатын өссө төгүл өйдөөҥ, —диэтэ Ольга Балабкина.
Санатан эттэххэ, вакцинацияны оҥорууга 273 пуун, 140 мобильнай биригээдэ, 20 мобильнай пуун үлэлииллэр. Кэлиҥҥи нэдиэлэҕэ Саха Өрөспүүбүлүкэтэ быһыыны ылыыга бастыҥ көрдөрүүлээх биэс субъект иһигэр киирдэ. Бу туһунан Ил Дархан уонна бырабыыталыстыба пресс-сулууспата иһитиннэрдэ.
Раиса Сибирякова, «Саха сирэ», edersaas.ru