Ольга Балабкина Нам улууһун гиэрбэтин кубалара уста сылдьалларын сонурҕаата
СӨ Бырабыытылыстыбатын бэрэссэдээтэлин солбуйааччы Ольга Балабкина Олоҥхо Ыһыаҕын сырдатар суруналыыстар пресс-кэмпириэнсийэлэригэр кыттыыны ылла.
edersaas.ru
Олоҥхо Ыһыаҕын тэрийэр кэмитиэт салайааччыта Ольга Балабкина суруналыыстарга суолталаах тэрээһини ыытыыга туһуламмыт ыйытыыларга бэрт интэриэһинэй хоруйдары биэрдэ.
— Бүгүн саха омук айылҕалыын алтыһар, сайыны уруйдуур, итэҕэлгэ чугаһыыр үөрүүлээх кэмигэр — Ыһыах күнүгэр Намҥа ыытылла турар Олоҥхо Ыһыаҕа ураты тыыннааҕын бу суолталаах тэрээһин кыттыылаахтара бары бэлиэтиибит. Бу чааска олоҥхоһуттар кыралыын-улаханныын үйэлэри уҥуордаан илдьэ кэлбит уостан уоска түһэрэр дорҕоонноох тойуктаах олоҥхо күрэҕэр кытталлар. Кэрэхсэбиллээҕэ баар, быйылгы Олоҥхо Ыһыаҕар «хаһааҥҥытааҕар да…» диэн тылы үгүстүк туттабыт. Холобура, хаһааҥҥытааҕар да элбэх — 97 оҕо олоҥхо күрэһигэр кэлэн кытта сылдьар. Бу киһи ис иһиттэн киэн туттар түгэнэ! Былырыын Алдан оройуонугар ыытыллыбыт Олоҥхо Ыһыаҕын биир үтүө өрүтэ — бу улуус Хатыстыырыттан оҕолор кэлэн олоҥхо күрэҕэр кыттыылара. Күөн күрэс буолан, кыттааччылар ох курдук оҥостон, анаан бэлэмнэнэн кэлбиттэр. Олоҥхо сайдыытыгар үлэлэһэр исписэлиистэр үһүс күннэрин түүннэри-күнүстэри дьүүллүүр сүбэнэн үлэлээтилэр.
Салгыы Ольга Балабкина Олоҥхо Ыһыаҕын бэлэмин тэрийиигэ, ыытыыга Нам улууһун муниципалитетын салалтата олус күүстээх уонна кыахтаах хамаанданы тэрийбитин туоһутунан бу олус суолталаах тэрээһин чаҕылхайдык уонна умнуллубаттык ыытыллыбытын бэлиэтээтэ. Кырдьык, сылы быһа бары араас хайысхаларга улуус салалтата өрөспүүбүлүкэ бырабыытылыстыбатын, ааттаах-суоллаах бөдөҥ тэрилтэлэр салайааччыларын, бизнес эйгэтин үлэһиттэрин, биир дойдулаахтарын кытта ыкса сибээһи олохтообуттарын түмүгэ — бүгүн көмүс буукубанан историяҕа киирбит XIII Олоҥхо Ыһыаҕа.
Пресс-кэмпириэнсийэҕэ мустубут суруналыыстар араас интэриэһиргиир боппуруостарын ыйыттылар. Мин Ольга Валерьевнаттан: «Намҥа ыытыллыбыт Олоҥхо Ыһыаҕар эн тус бэйэҥ ордук туох сонун өрүтү бэлиэтии көрдүҥ?» — диэн ыйыппыппар, олус күүппүт хардабын эттэ:
— Биллэн турар, куба. Тэрээһин мунньахха намнар сүрүн соруктарынан улуустарын гиэрбэтин символыгар — Кубаҕа болҕомтону ууруохтарын баҕарбыттара. Ол толкуйдарын олоххо киллэрбиттэрэ харахха чуо быраҕыллар. Ханна көрөҕүн — барыта Куба символа. Бэл, Аал Луук Мас аттыгар тыыннаах кубалар уста сылдьаллар!
Пресс-кэмпириэнсийэҕэ бырабыытылыстыба бэрэссэдээтэлин солбуйааччы Ольга Балабкина Олоҥхо Ыһыаҕын сүрүн идиэйэтин маннык бэлиэтээтэ:
— Олоҥхо Ыһыахтара өрөспүүбүлүкэ бары улуустарыгар ыытыллыыларын сүрүн соругунан саха норуотун үйэлэргэ сүппэт эпическэй айымньыта — олоҥхо өрөспүүбүлүкэбитигэр олорор норуоттарга өйдөрүгэр-санааларыгар иҥэн, норуоттар доҕордоһууларын кытаатыннарар күүстээх айылгылаах буолуохтаах. Бу өрүт былырыын Алдан оройуонугар ыытыллыбыт Олоҥхо Ыһыаҕар чаҕылхайдык арыллыбыта. Онтон быйыл Намҥа ыытыллыбыт ыһыах бу соругу дьэҥкэтик бигэргэттэ.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.